Saltar o menú de navegación e ir ao contido

  • Bienvenido (ES) | Ongi etorri (euskarazko bertsioa) | Benvingut (versió en català) | Benvido (versión en galego)
  • Bienvenido (ES)
  • Boletines
    •  | Baixa  | Máis opcións |
  • Portadas anteriores

EROSKI CONSUMER, el diario del consumidor

Buscador

logotipo de fundación

Canles de EROSKI CONSUMER


Estás na seguinte localización: Portada > Edición impresa > O máis práctico > Consellos

Λ

Economía e turismo: O euro, o guía turístico máis rendible

Destinos como Estados Unidos, Inglaterra, Arxentina ou México son agora máis baratos pola forte revalorización do euro. Portugal e Suíza, pola contra, son algo máis caros

 Nin as suxestivas canles venecianas, nin as paisaxes paradisíacas caribeñas. Este ano o atractivo das vacacións recae, en boa medida, nun guía moi particular, redondo e cun mapa de Europa como paisaxe de fondo: o euro. A forte suba que experimentou a moeda única nos últimos anos fronte a outras divisas internacionais como o dólar, o ien ou a libra esterlina fai que, na actualidade, resulte moito máis barato viaxar a destinos inalcanzables ata agora para moitos petos como Nova York, Tokyo ou a city londiniense. Ademais, a supremacía da nosa divisa fronte ás moedas latinoamericanas abaratou destinos de soño como as praias chilenas, a Patagonia Arxentina ou o Caribe mexicano. Cos mesmos cartos ca noutros veráns, é posible que nesta ocasión si que se poida realizar esa viaxe desexada dende hai anos. Pero, ollo!, tamén hai outros destinos a onde viaxar non resulta tan barato como se cadra parece. Portugal, que rexistrou importantes reformas económicas que elevaron notablemente o seu nivel de vida, ou Suíza, onde a moeda se revalorizou fronte ao euro, son destinos máis caros ca en anos anteriores. Coñeza dunha ollada cales son eses puntos do globo terráqueo máis e menos atraentes para o peto este ano, en función da cotización das súas divisas:

 

Destinos máis caros que en 2007

  • Brasil
  • Suíza
  • Israel

Destinos de prezo similar a 2007

  • Senegal
  • Guinea
  • Burundi
  • Costa de Marfil
  • Eslovenia
  • Malta
  • Chipre
  • Polonia
  • Eslovaquia
  • Croacia
  • Australia
  • Nova Zelandia

Destinos máis baratos que en 2007

  • EEUU
  • Canadá
  • México
  • Arxentina
  • Gran Bretaña
  • Marrocos
  • Egipto
  • Turquia
  • Siria
  • Líbano
  • India
  • Rusia
  • Chinesa
  • Xapón

América

Destinos máis baratos: o soño americano e as praias caribeñas

  América é un dos continentes que ofrece mellores oportunidades para viaxar a bo prezo este ano. Para empezar, Estados Unidos converteuse no destino estrela das axencias de viaxes, pola debilidade da súa moeda, o dólar, que cotiza en mínimos históricos fronte ao euro. Se hai un ano un euro se trocaba por 1,35 dólares, na actualidade alcanza os 1,60 dólares, é dicir, a divisa europea vale agora un 18% máis ca en maio do 2007. Tendo en conta a evolución da moeda única, moito máis potente ca o dólar, este ano resulta menos doloroso para o peto viaxar a cidades como Nova York, Washington, Los Ángeles, Orlando ou Chicago. O aloxamento, a comida e tamén os regalos son moito máis baratos ca hai un ano, ata o punto de que o aforro pode superar o 10%.

Outro destino americano con dólar propio que invita a ser visitado este ano é Canadá. O dólar canadense desvalorizouse un 20% fronte ao euro no último ano. Ao se tratar dun país cunha inflación controlada, a caída da moeda percíbese en maior medida ca a leve suba que experimentaron os prezos nos últimos doce meses.

Son latino:

Se o idioma é un obstáculo á hora de viaxar a Norteamérica, os españois poden optar este ano por visitar a bo prezo países de fala hispana como Arxentina ou México, onde os seus respectivos pesos se desvalorizaron un 20% e un 12% no último ano. A isto hai que sumar a guerra de tarifas na que se atopan inmersas as aeroliñas por ofreceren voos cara a estes destinos a bo prezo. A oferta multiplicouse, co que os traxectos tamén diminuíron o seu custo nos últimos meses, sobre todo os dirixidos cara á Riviera Maya mexicana.

Mellor absterse: Brasil quece

  As paradisíacas praias brasileiras son, pola contra, un dos destinos que máis caros se tornaron nos últimos meses. A recuperación da economía de Brasil favoreceu un levantamento da súa moeda fronte a o euro. Nos últimos doce meses, o euro pasou de intercambiarse por 3 reais brasileiros a facelo por só 2,66, o que supón unha diferenza do 12%. Aínda que o seu nivel de vida é máis baixo ca o europeo, as vacacións en Brasil serán este ano algo máis caras ca no 2007.

Europa

Gran Bretaña, Turquía e Rusia, de rebaixas

  En Europa son quince os países que comparten moeda, entre eles España, e que forman a zona euro. Non obstante, convén ter en conta que outros moitos destinos dispoñen de moeda propia e de particularidades económicas e políticas que poden condicionar dende un punto de vista económico unha viaxe de vacacións. Dentro dos destinos máis atraentes este ano figura o Reino Unido, xa que a súa moeda, a libra esterlina, se desvalorizou notablemente fronte ao euro nos últimos doce meses, período no que perdeu case un 20% do seu valor (en maio do 2007 por un euro ofrecían 0,67 libras e agora intercámbiase por 0,80 libras esterlinas). Viaxar a Inglaterra, Escocia ou Gales é agora un pouco máis barato ca hai un ano. En particular, son especialmente interesantes as ofertas para viaxar a Londres, un destino moi visitado polos españois e disputado polas aeroliñas de baixo custo.

No tocante a países fóra da Unión Europea, paga a pena visitar Rusia e Turquía. Tamén as moedas destes destinos se desvalorizaron fronte ao euro no último ano (as liras turcas cotízanse un 25% menos este ano ca no 2007 e o rublo ruso arredor dun 5% menos). Turquía é, precisamente, un dos destinos máis baratos do vello continente, xa que o seu nivel de vida é bastante máis baixo ca o español. Pódese comer por tres euros ao día e gozar dun bo hotel por uns 35 euros a noite. En canto a Rusia, tamén pode ser un bo momento viaxar agora, xa que as perspectivas económicas apuntan cara a unha mellora notable para os próximos anos, o que se manifestará nun incremento nos seus prezos. Só no 2007, o PIB ruso medrou un 8%, o seu maior aumento dende o ano 2000.

Recentes incorporacións ao euro e países do Leste

  Non está de máis valorar as ofertas que ofrecen os países da Europa do Leste, xa que aprazar a súa visita pódelle saír caro ao viaxeiro español. Convén ter en conta, por exemplo, que os últimos países incorporados ao euro, entre eles Eslovenia (xunto con Malta e Chipre), incrementaron notablemente os seus prezos coa adaptación á divisa comunitaria nos últimos meses, co que agora é algo máis caro viaxar alí ca hai uns anos. Non obstante, as perspectivas económicas tamén amosan unha clara tendencia de adaptación no nivel de prezos destes países ao dos máis desenvolvidos como Alemaña ou Francia. Polo tanto, para quen teña pendente viaxar a estas zonas, pode que non precisen espremer tanto o seu peto este ano. O mesmo acontece cos últimos países incorporados á Unión Europea, como Polonia, Eslovaquia ou Croacia. Pouco a pouco, o seu nivel de vida vaise equiparando á media europea, co que xa non resulta tan barato viaxar a eles coma hai uns anos. En calquera caso, para viaxar a estes últimos destinos habería que cambiar euros polas súas respectivas moedas, a kuna croata, a coroa eslovaca e o sloty polaco. As súas cotizacións apenas varían fronte a o euro.

Coidado con Suíza

Suíza, país que destaca pola súa sólida estabilidade económica e política, segue a ser un dos destinos máis caros, tal e como se reflicte na fortaleza da súa moeda, o franco suízo. Só nos últimos doce meses esta divisa revalorizouse un 5% fronte ao euro. Ademais, o seu nivel de vida é superior ao de España, e isto sumado á celebración este ano da Eurocopa Suíza, están encarecendo as viaxes a esta rexión da Europa central.

Asia

Destinos menos onerosos: China e Xapón gañan atractivo

  Asia é aínda un dos continentes menos demandados polos españois na elección das súas vacacións. Non obstante, sobresae o crecente interese que esperta China, influído en boa medida pola celebración dos Xogos Olímpicos. Aínda que os hoteleiros aproveitan a ocasión para incrementar os prezos dos seus cuartos, o iuan (a moeda chinesa) depreciouse un 25% fronte ao euro no último ano, co que pode compensar considerar unha visita ao país da Gran Muralla. Aínda que o voo e o aloxamento supoñan facer un esforzo extra en prezo, fronte a outros destinos como os comentados de México e Arxentina, o aloxamento, comida, transporte e compras en China serán máis económicos.

Xunto a China, outro destino asiático para que pode gañar adeptos este verán é Xapón. Os que aprazaran en ocasións a súa viaxe ao país do Sol Nacente poden volver considerar este verán a súa realización. Neste caso, un dos maiores atractivos radica na compra de produtos tecnolóxicos. A depreciación que sufriu o ien fronte ao euro nos últimos doce meses (arredor do 12%) abarata os máis novidosos dispositivos electrónicos.

Para os máis atrevidos, outros destinos asiáticos que se abarataron polo cambio das súas moedas (referenciadas á desvalorizada libra esterlina) son a India, Siria e o Líbano.

Mellor absterse: Israel encarece

Pola contra, non é o mellor momento para visitar Israel. A súa moeda, o shequel, revalorizouse un 7% no último ano fronte ao euro. Ademais, debido a que é un destino pouco explotado dende o punto de vista comercial, os voos son escasos e, polo tanto, bastante caros. Mentres que unha viaxe con aloxamento de 12 días en México pode saír por 800 euros, só o voo máis económico a Israel pode custar máis de 600 euros.

Oceanía

Australia e Nova Zelandia: Destinos caros

En Oceanía, as viaxes seguen a resultar caras e o intercambio monetario tampouco axuda demasiado. No último ano, aínda que tanto a libra australiana como o dólar neocelandés perderon valor fronte ao euro (arredor dun 5% en ambos os dous casos), a oferta de vacacións segue a ser escasa para o viaxeiro español, sobre todo pola súa distancia e a maior demanda doutros destinos.

África

O encanto marroquí brilla

  O continente africano tamén ofrece este ano interesantes destinos nos que se pode aforrar pola fortaleza do euro con respecto ás súas moedas. É o caso de Marrocos, onde o dirham caeu un 3% nos últimos doce meses. Xa de por si, trátase dun país no que se poden pasar unhas vacacións económicas, pero, ademais, este ano a revalorización do euro axuda un pouco máis a aforrar en custos. O mesmo acontece nas viaxes a Exipto, onde a súa divisa, a libra exipcia (referenciada á libra esterlina), tamén perdeu valor con respecto ao euro.

Atentos á influencia suíza

Convén absterse de visitar Senegal, Guinea, Burundi e Costa de Marfil. As moedas destes países están referenciadas ao franco suízo, que se amosou máis forte ca o euro nos últimos meses. Como países pobres, a vida neles é, así e todo, moito máis barata ca en España.


Outros servizos


Buscar en

Información de Copyright e aviso legal

Visita nuestro canal Eroski Consumer TV

En EROSKI CONSUMER tomámosnos moi en serio a privacidad dos teus datos, aviso legal. © Fundación EROSKI

Fundación EROSKI

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto