Seguridade nas escolas: analizadas 208 en toda España: Unha de cada catro escolas suspende en seguridade

Seguridade en caso de emerxencia: moito por mellorar e táboa comparativa

Aínda que en todos os centros había extintores (se ben nun 2% dos casos eran escasos ou non os había en todos os andares do edificio), o 28% deles carecía de tomas de auga para combater incendios (no 2003 esta proporción foi a dobre). Ademais, un de cada tres centros non contan con sistemas de detección de incendios (no 2003 a proporción era tamén do dobre). A pesar diso, o 92% das escolas conta con sistemas sonoros de alarma en caso de emerxencia, aínda que no 8% restante (os peores os de Granada, Madrid e A Coruña) ou ben non tiñan ou ben non funcionaban de xeito adecuado, tal e como admitiron os responsables entrevistados nos centros escolares. Ademais, é necesario que a audición dos sinais de alarma sexa perceptible en todas as dependencias dos centros, aínda que conten con varios edificios.

Unha das maiores carencias é a das saídas de emerxencia: un 28% dos centros carecía delas. E entre os que contaban con estas saídas, un 2% mantenas con obstáculos que impiden o seu uso, no 13% dos casos non se abren con facilidade ou están pechadas e o 17% delas non se abren cara a fóra, tal e como obriga a normativa. Ademais, non hai carteis indicadores de saídas de emerxencia no 13% dos centros (no 2003 a proporción foi case tres veces maior). Por outra banda, case na metade dos centros non había carteis ou mapas (planos do tipo "vostede está aquí") sobre como actuar en caso de emerxencia. Nos centros visitados en Almería, Córdoba, Madrid e Zaragoza, case tres de cada catro carecían desta medida informativa.

Outra cuestión mellorable son as ventás con reixas das aulas, que se deben poder abrir dende dentro para saír en caso de emerxencia, evacuación ou incendio: no 37% dos centros que contan con reixas nas ventás isto non era posible, aínda que a proporción diminuíu fronte á rexistrada no 2003: un 73%.

En case un de cada tres centros (empeorouse, foron un de cada cinco no 2003) as portas dalgunhas aulas estaban enfrontadas con portas doutras aulas, o que dificulta a súa evacuación en caso de emerxencia. Outro apartado de seguridade no que a mellora foi inexistente é o das cociñas: unha de cada oito escolas incumpre a normativa de protección contra incendios, ao non ter instalada a cociña no baixo do edificio (no 2003 a proporción foi similar). En Valladolid, Valencia e Murcia eran aproximadamente a metade dos centros, aínda que en 11 das 18 capitais ningún centro visitado incumpría este precepto básico de seguridade. Ademais, en un de cada catro centros que contan con cociña esta non posúe polo menos dúas saídas, e unha delas (como mínimo) ao exterior, ao que tamén obriga a lexislación.

TÁBOA COMPARATIVA

(1) Seguridade no exterior: observouse a presenza de obxectos perigosos no patio; se porterías, canastras ou outros elementos entrañaban algún tipo de perigo e estaban correctamente ancoradas ao chan; se hai liñas de alta tensión nas proximidades da escola; se o chan do patio se atopaba en bo estado de conservación; se hai zonas perigosas no exterior dos edificios.

(2) Seguridade nos recintos pechados: se había obxectos que puidesen entrañar perigo, se as aulas estaban enfrontadas nos corredores (dificultaría a evacuación), se as ventás con reixas son practicables dende dentro, se había elementos perigosos en aseos, ximnasio, comedor, corredores, escaleiras, etc. Nos centros con cociña: se está situada no baixo e se conta con dúas portas, unha delas ao exterior.

(3) Plan de emerxencia e atención sanitaria: se se ten Plan de Seguridade, evacuación ou emerxencia, se os traballadores están involucrados nese plan; se se fan simulacros e a súa periodicidade, se os alumnos teñen información escrita do protocolo de actuación en caso de emerxencia e se o centro conta con sala de enfermería ou con botica de primeiros auxilios atendida por unha persoa coa titulación axeitada.

(4) Seguridade contra incendios: presenza de extintores e o seu estado, se había tomas de auga, se había luces de emerxencia en recintos pechados, se se viron sistemas de detección de incendios e carteis indicadores de dirección de saídas de emerxencia, e se estas eran practicables.

Relacións deste contido