Merca un billete de avión por Internet a un prezo e a compañía contéstalle que debe pagar o dobre por un erro informático

A miña parella e mais eu visitamos unha web en busca de billetes de avión, reservámolos e demos o número de tarxeta de crédito para contratar cinco voos. Pero a nosa sorpresa foi atopar no correo electrónico un correo en referencia a un dos voos confirmados onde nos comunicaban que, por mor dun erro informático, a páxina web deu un prezo de reserva incorrecto e que o custo real é practicamente o dobre. Contestamos a este correo electrónico manifestando o noso desacordo e solicitando a confirmación da reserva nas condicións iniciais. En que lei podemos basear a nosa reclamación?

 Suxerimos que os afectados baseen a súa reclamación na Lei xeral de defensa dos consumidores e usuarios. O seu artigo 8 di que a oferta, promoción e publicidade dos produtos e servizos se axustarán á súa natureza, características, condicións, utilidade e finalidade. O contido das ofertas, as condicións e garantías ofrecidas son esixibles polos usuarios, aínda cando non figuren expresamente no contrato asinado ou en documento recibido. Ademais, a información correcta e veraz é un dereito básico do consumidor, de xeito que se debe informar do prezo final completo, analizando o importe dos incrementos ou descontos que sexan de aplicación e gastos adicionais. Dado que como o afectado sinala as compañías aéreas non admiten reclamacións dos usuarios por erros cometidos na realización da reserva on line, tampouco poden ampararse nun erro desta natureza para eximir as súas responsabilidades e xustificar un incumprimento da súa propia oferta.

Relacións deste contido