Perden o segundo voo por un atraso no primeiro e a compañía non os indemniza

Somos un grupo de amigos que contratamos unha viaxe de catro días a Canarias a través dunha compañía aérea que voaba ata Madrid e outra que facía o percorrido Madrid-Canarias. O día de saída amenceu nevado, polo que o voo saíu con dúas horas e media de atraso, co que perdemos o segundo voo dende Madrid. Non obstante, a compañía non nos deu ningún tipo de información e non tivemos ningunha marxe de manobra para buscar unha solución. Por esta razón, presentamos unha reclamación en Madrid ante a compañía aérea e a través da OMIC, xa que tivemos que mercar cinco novos billetes por 382 euros cada un. O problema é que dende Consumo responden que non se pode acudir á arbitraxe de consumo porque a compañía reclamada non está adherida. Cales son, entón, os dereitos dos pasaxeiros?

En primeiro lugar, convén saber que non todos os atrasos xeran dereitos a favor do pasaxeiro. De feito, só acontece nos seguintes supostos:

• Atrasos de dúas ou máis horas en voos de ata 1.500 km.
• Atrasos de tres ou máis horas en todos os voos intracomunitarios de máis de 1.500 km e en todos os demais voos de entre 1.500 e 3.500 km.
• Atrasos de catro ou máis horas no resto de voos.

  Nestes casos, o pasaxeiro ten dereito, polo menos, a recibir unha asistencia baseada en comida e refrescos suficientes en función do tempo de espera. Ademais débeselle ofrecer ao afectado a posibilidade de que realice dúas chamadas telefónicas. Neste caso, o atraso superou as dúas horas nun voo de ata 1.500 km., polo que calquera afectado ten dereito á devandita asistencia. Non obstante, se as condicións climáticas foron a causa do atraso, non se lle pode imputar responsabilidade á compañía aérea. Agora ben, posto que lle denegaron asistencia e información aos afectados, pódese interpoñer unha reclamación ante a Dirección Xeral de Aviación Civil que poderá adoptar medidas sancionadoras fronte á compañía aérea, formulando tamén a cuestión de se as condicións climáticas aconsellaban ou non o atraso do voo.

Relacións deste contido