Turismo urbano: proba práctica en 18 cidades: As cidades aínda non pensan abondo nos turistas que as visitan

A cidade ideal para o turista

A cidade ideal para o turista é aquela que cobre as súas necesidades dende a súa saída ata o seu regreso á casa. Para iso debe ofrecer os seguintes servizos:

• Información: moitos viaxeiros preparan as súas saídas axudándose das novas tecnoloxías. De aí que sexa moi importante que a cidade ofreza unha información útil a través da rede, con datos sobre aloxamento, lugares que se poden visitar, zonas de lecer... Maior é a relevancia das oficinas de turismo, que deben ofrecer un servizo útil que inclúa os puntos de interese turístico, onde aloxarse, a oferta cultural e de lecer e todo tipo de recomendacións.
• Conexións: a cidade debe contar con boas conexións. As estacións de trens e autobuses, aeroportos ou portos son o punto de chegada para moitos turistas e é alí onde buscan nun principio información sobre o destino, de aí a utilidade de puntos de información.
• Transporte urbano: unha localidade turística debe ofrecer un bo transporte metropolitano (autobuses, metro, tranvía, taxi...).
• Aloxamento: unha cidade ten que dispoñer dunha ampla oferta de aloxamento e de calidade.
• Transporte turístico e visitas guiadas: algúns turistas prefiren percorrer a cidade pola súa conta, pero outros buscan coñecer lugares da man dun guía que achegue unha información extra.
• Oferta gastronómica, lúdica e cultural: a chave do turismo urbano. Unha cidade resultará atractiva se conta con museos, cascos históricos rehabilitados, monumentos, centros culturais, teatros... así como cun amplo abano de restaurantes, bares e cafeterías.
• Tráfico amable: o coche é outro dos medios de transporte dos turistas. Por iso, unha cidade gañará puntos se ofrece un tráfico fluído, sen aglomeracións nin atoamentos.
• Sinalización: que un turista non se perda é algo fundamental, polo que a cidade debe contar con suficientes sinais en bo estado e visibles que indiquen a dirección a lugares de interese.
• Destino turístico seguro: a seguridade nas rúas é un elemento clave para que o viaxeiro se sinta tranquilo e relaxado.
• Cidade limpa e sostible: ruídos, contaminación, sucidade... non son pratos de bo gusto para o turista.

TÁBOA COMPARATIVA

Pensan as cidades españolas no turista?. 18 delas, a exame

Cidade	Sinalización (1)	Oficina de Turismo (2)	Visita guiada/Bus turístico (3)	Estacións de transporte (4)	Nota media final
A Coruña	Ben	Aceptable	*	Regular	Regular
Alacante	Ben	Moi Ben	Moi Ben	Aceptable	Ben
Barcelona	Ben	Ben	Excelente	Ben	Moi Ben
Bilbao	Ben	Ben	Ben	Aceptable	Ben
Córdoba	Moi Ben	Regular	Aceptable-Ben	Ben	Aceptable
Granada	Moi Ben	Ben	Moi Ben	Aceptable	Ben
Madrid	Aceptable	Aceptable	Ben	Ben	Ben
Málaga	Ben	Aceptable	Ben-Moi Ben	Aceptable	Ben
Murcia	Moi Ben	Aceptable	Moi Ben	Regular	Aceptable
Oviedo	Ben	Ben	*	Ben	Aceptable
Pamplona	Moi Ben	Ben	Moi Ben	Regular	Aceptable
San Sebastián	Ben	Ben	Ben	Regular	Aceptable
Santander	Aceptable	Regular	*	Regular	Regular
Sevilla	Ben	Ben	Moi Ben	Regular	Aceptable
Valencia	Moi Ben	Ben	Ben-Moi Ben	Aceptable	Ben
Valladolid	Moi Ben	Ben	Ben	Regular	Aceptable
Vitoria	Ben	Moi Ben	Moi Ben	Regular	Aceptable
Zaragoza	Aceptable	Ben	Ben	Aceptable	Aceptable
Media	Ben	Aceptable	Ben	Regular	Aceptable

(1). Sinalización: mediuse a facilidade para localizar os principais destinos de interese turístico de cada cidade así como para transitar por ela. Tamén se valorou a cantidade de sinalización existente (hoteis, oficinas de turismo, estacións de transporte, hospitais, etc.) e o seu estado de conservación.

(2). Oficina de Turismo: Valorouse, tras unha única visita, a atención facilitada en cada oficina de turismo, a cantidade, calidade e detalle da información subministrada e mais o interese amosado polos gustos e preferencias do turista. Comprobouse tamén se as oficinas estaban adaptadas a minusválidos, o seu estado de limpeza e conservación, os horarios de atención ao público e se contaban con persoal abondo de atención ao público. En definitiva, comprobouse se o turista sae da oficina coa sensación de que obtivo unha información útil e detallada sobre a cidade que se dispón a visitar.

(3). Visita guiada/bus turístico: Comprobouse se os percorridos se axustan ao ofertado e comezan á hora prevista, a profesionalidade de guías e condutores, os idiomas nos que se facilita a información (e se esta se dá por escrito), se as explicacións son detalladas, etc. Ademais, valorouse a variedade de oferta existente en cada cidade para ambos os dous servizos, os seus prezos e descontos.

(4). Estacións de transporte: valorouse a limpeza, accesibilidade e estado de conservación das estacións de autobuses e trens de cada cidade. Ademais, comprobouse se nelas se lle facilita ao viaxeiro algún tipo de información turística, se contan con oficinas de turismo (e se permanecen abertas o sábado), se hai fotografías, imaxes, ou descricións sobre a cidade e os seus lugares, edificios, monumentos, etc. emblemáticos, así como se existe algún sistema de información turística alternativa (ordenadores, mensaxes por SMS ou bluetooth, etc.).

* Non se valorou o servizo de visita guiada ou bus turístico, porque ou ben carecía deles ou ben porque non estaban en funcionamento no momento de realizar o estudo.

O que custa ver a cidade cun guía ou nun autobús turístico

Cidade	Prezo autobús turístico	Prezo visitas guiadas
A Coruña	Só no verán	Só no verán
Alacante	Non hai	8
Barcelona	19	9,5
Bilbao	12	4
Córdoba	6	14
Granada	12,4	10
Madrid	15,3	3,25
Málaga	15	Gratuíta
Murcia	Non hai	Gratuíta
Oviedo	Non hai	Só oferta privada
Pamplona	Non hai	5
San Sebastián	12	5
Santander	Só no verán	Só no verán
Sevilla	15	Só oferta privada
Valencia	12	Só oferta privada (1)
Valladolid	5	Só no verán
Vitoria	Só no verán	3
Zaragoza	4,2	4,2

Prezos en euros.

(1). Valencia: alúganse tamén audio-guías mediante mp3 (10 euros medio día e 15 euros o día completo) na oficina de turismo municipal.

Relacións deste contido