Propiedade intelectual

Cobramento indebido de canon ou dereito de remuneración por copia privada

  Un consumidor mercou un cd virxe polo que pagou 60 céntimos. Na factura analizada que se lle entregou aparecía 0,33 céntimos como prezo do disco, 0,19 por canon de propiedade intelectual e 0,08 de IVE. Non conforme co pagamento do canon, acudiu a xuízo reclamando a súa devolución e a súa demanda foi estimada. A Audiencia Provincial de Málaga, en sentenza do 19 de setembro do 2006, estableceu que, segundo a lei de propiedade intelectual, a reprodución ou copia de obras de autores para uso privado dá dereito a unha remuneración por copia privada para compensar aos autores polos dereitos de propiedade intelectual que deixan de percibir (por non vender orixinais ao facerse a copia) a través dun canon aos consumidores. Non obstante, a Audiencia de Málaga entendeu tamén que se se xustifica o uso do soporte para outro fin distinto non habería que pagar o canon. Como neste caso o consumidor probou que o destino do cd virxe non era reproducir obra ningunha de autor, o establecemento demandado foi condenado a devolver os 19 céntimos cobrados por canon, máis xuros.

Relacións deste contido