O caixeiro automático entregou 50 euros menos e o banco non se fai cargo

Intentei extraer 150 euros da miña conta nun caixeiro automático, pero expulsou só 100 euros, aínda que fixo un débito por 150 euros. Cando reclamei, informáronme que ían facer o arqueo do caixeiro. Chamei de novo e dixéronme que as cantidades do caixeiro cadraban perfectamente. Por esta razón quería saber onde reclamar, xa que na miña conta aparece que teño 50 euros menos e estes nunca saíron do caixeiro.

 

A primeira acción é dirixirse por escrito fidedigno ao Servizo de Atención ao Cliente ou ao Defensor do Cliente do banco formulando a reclamación, e sobre isto a persoa afectada pódese informar na súa sucursal. Convén que conserve unha copia selada da súa queixa e, se en dous meses non obtén unha resposta satisfactoria, pode acudir ao Servizo de Reclamacións do Banco de España, na sede central -rúa Alcalá, n.º 48, 28014 Madrid- ou a calquera outra da rede de sucursais. Dispón de formularios e máis información na web www.bde.es. O procedemento é gratuíto e pode reclamar calquera persoa, nacional ou estranxeira, en condición de usuario do servizo bancario debidamente identificado. O Banco de España solicitaralle ao banco en cuestión que faga as súas alegacións con respecto á súa queixa e, a partir de aí, deberá resolver nun prazo de tres meses. Aínda que o informe que emita o Banco de España non é vinculante para as entidades reclamadas, na maioría das ocasións rectifican e admiten as recomendacións do Servizo de Reclamacións do Banco de España.

A persoa afectada pode alegar a Recomendación 88/590 relativa aos sistemas de pagamento e, en particular, ás relacións entre titulares e emisores de tarxetas. Nela dise que é indispensable que as operacións efectuadas con tarxetas se consignen nun rexistro, de tal maneira que quede constancia destas e poidan rectificarse os erros. Engade ademais que, como o titular non ten acceso a tales rexistros, a obriga de probar que unha determinada operación foi correctamente rexistrada e contabilizada, sen que se vira afectada por ningunha avaría técnica ou por calquera outra anomalía correspóndelle ao emisor da tarxeta.

Tamén no Código de Boa Conduta sobre a protección dos consumidores en materia de medios de pagamento se indica que, se o propietario da tarxeta alega que unha transacción se realizou de modo incorrecto, o emisor deberá amosar, mediante extracto dun rexistro interno, que a operación foi fielmente rexistrada e anotada nas contas e que non sufriu ningunha avaría ou deficiencia.

Relacións deste contido