Un coche novo falla e os recambios non chegan

Adquirín un vehículo novo nun concesionario, pero ós 5 días deixou de funcionar o abs e o control de estabilidade e o de tracción. No concesionario indicáronme que non sabían cando chegarían os recambios. Ó cuarto día ninguén sabía nada, o meu coche seguía sen ser reparado e o servizo de atención ó cliente non respondía. Que prazo ten un fabricante para subministrar pezas de recambio? Para que serven os servizos de atención ó cliente?

 A Lei xeral de defensa do consumidor afirma que nos bens de natureza duradeira, como os vehículos, o consumidor terá dereito a un adecuado servizo técnico e á dispoñibilidade de repostos durante un prazo determinado, o que ratifica a Lei de ordenación do comercio polo miúdo. Non obstante, a diferenza do que acontece no ámbito dos electrodomésticos, no que se regulan os prazos para servir pezas de recambio, en ningunha das normas indicadas se vai máis alá de establecer un inconcreto dereito a un adecuado servizo técnico. Tampouco no Real Decreto de servizos de reparación dos talleres de automóbiles se fixa un prazo determinado para subministrar estas pezas.

Non obstante, na situación descrita é tamén aplicable a Lei de garantías de bens mobles, por se tratar dun vehículo acabado de adquirido. Segundo esta lei, o consumidor ten dereito á reparación ou á substitución do ben mercado. De se optar pola reparación, amais de ser gratuíta, débese realizar nun prazo razoable e sen maiores inconvenientes para o afectado. E cando non sexa así ou a reparación sexa imposible, poderá esixir unha rebaixa do prezo ou a resolución do contrato.

No caso presentado, a suxestión é dirixirse por escrito (burofax con xustificante de recibimento e certificado) ó vendedor e reclamar a reparación nun prazo razoable, amais de advertir de que, de non ser así, se solicitará, conforme á Lei de garantías, outro vehículo novo igual ó adquirido ou a resolución do contrato de compra con devolución do prezo. Como prazo "razoable" pode servir, por analoxía, o aplicado no sector de electrodomésticos, que conta cunha norma reguladora que di que todas as pezas de reposto deberanlle ser subministradas ó cliente nun prazo non superior a un mes desde a data de solicitude para os aparellos de importación e non superior a 15 días para as pezas correspondentes a aparellos nacionais. Se no se obtén unha resposta satisfactoria, recoméndase solicitar unha Folla de reclamacións, cumprimentala e acudir a unha Oficina de información ó consumidor e/ou a un avogado.

Relacións deste contido