Exercicio físico: O último para estar en forma

Cada vez son máis as persoas que buscan novas alternativas para estaren en forma. A moda do ximnasio, como a chamaron algúns sociólogos, instalouse definitivamente en España, procedente doutros países como os Estados Unidos. E é que son xa seis de cada dez habitantes de España os que practican algún tipo de deporte. Acadar un bo estado físico, mellorar a saúde e a imaxe e alixeirar tensións son os principais motivos que esgrimen as persoas que acoden decote a algún centro deportivo.

  O interese céntrase en deportes que non só permiten acadar un bo estado físico, senón tamén a diversión e a relaxación no tempo de lecer. De aí a constante aparición de novas modalidades. O sector está en continua evolución e, a miúdo, cando comezan a implantarse novas actividades nos ximnasios, aparecen xa outras máis novas no mercado con resultados visibles en menos tempo.

As tradicionais clases de aeróbic e de step xa son parte do pasado, e foron substituídas por nomes case impronunciables, como Body Pump, Spinning, Aerobox ou Thai Boxing. Así e todo, estas actividades tamén teñen data de caducidade, e nun breve prazo daranlle paso ao Ioga nas súas diferentes versións, especialmente o Bikram Ioga, Intensati, Masala Bhangra, Forza, Performance Max Program, Stiletto Strength, Gyritonic e a consagración dos adestramentos personalizados (personal training).

Artes marciais a ritmo de música

Body Combat.

 É un programa de adestramento aeróbico, de resistencia e flexibilidade, que combina e adapta movementos e técnicas de boxeo, kickboxing, karate, tai-chi, taekwondo, muay thai e doutras artes marciais para crear unha clase colectiva intensa ao ritmo dunha música con efectos especiais. Aínda que non hai contacto físico -faise fronte ao espello- hai que dar golpes e patadas, simular combates e adestramentos.

• Que músculos se traballan. Con este tipo de exercicio involúcrase moito a parte superior do corpo, o que o distingue doutras disciplinas aeróbicas. O Body Combat fortalece os ombreiros, os brazos, os abdominais e as costas.
• Quen o pode practicar. Está recomendado para calquera idade e sexo. A brusquidade dos movementos faino desaconsellable para as mulleres embarazadas.
• Beneficios. É un efectivo adestramento aeróbico e de tonificación muscular. Mellora o traballo cardiovascular. Á vez que se gana forza, resistencia, flexibilidade e enerxía, apréndense técnicas de defensa, libéranse tensións e quéimanse moitas calorías.
• Contraindicacións. Está contraindicado para quen sufra osteocartrite no xeonllo ou na cadeira, sempre e cando o médico non ditamine o contrario.
• Precaucións que hai que ter en conta. Durante a práctica de Body Combat poden aparecer problemas coas extensións cando se realiza algún exercicio. Tamén poden xurdir molestias de tendinites e bursites no ombreiro, e problemas nas articulacións.
• Debe saber que... Non é unha arte marcial, xa que en ningún momento hai contacto ou proxeccións (como patadas, puñadas ou golpes) cara a outras persoas. Todo o traballo realízase fronte ao espello e en sombra. Os alumnos non lle baten a un obxecto real, senón figurado.

Relacións deste contido