Saltar o menú de navegación e ir ao contido

  • Bienvenido (ES) | Ongi etorri (euskarazko bertsioa) | Benvingut (versió en català) | Benvido (versión en galego)
  • Bienvenido (ES)
  • Boletines
    •  | Baixa  | Máis opcións |
  • Portadas anteriores

EROSKI CONSUMER, el diario del consumidor

Buscador

logotipo de fundación

Canles de EROSKI CONSUMER


Estás na seguinte localización: Portada > Edición impresa > Psicoloxía

Λ

Volta ao cole: Regreso sen traumas

Un pouco de previsión e moita atención e agarimo poden paliar o desgusto e a dificultade do retorno á rutina escolar logo das vacacións

 O remate das vacacións e a volta á rutina non só lles afecta aos adultos. Os nenos tamén sofren unha etapa delicada co regreso á escola ou co comezo da gardería. A incorporación ás aulas tras tres meses de vacacións cáusalles problemas de adaptación ao 5% dos nenos e nenas de entre 3 e 8 anos. A recuperación do ritmo de clases e estudo convértese, en especial para os máis cativos ou para quen acode á escola por primeira vez, na materia máis difícil do curso. Aínda que non hai fórmulas máxicas, é posible suavizar esta particular "operación retorno".

Preparación previa

  • Visite co neno o centro escolar antes de que comecen as clases, e preséntelle á súa mestra para que saiba con quen vai quedar. Axudarao a familiarizarse e a non sentirse tan estraño o primeiro día.
  • Se ten idade para entendelos, léalle contos sobre nenos e nenas que comezan a escola, pais e nais que marchan traballar e volven despois de recoller os seus fillos, e sobre actividades na gardería ou na escola.
  • Cóntelles as súas propias vivencias infantís. Cando as lembre e as relacione coas súas, sentirase máis tranquilo no seu novo contorno.
  • Explíquelle detidamente todo o que o agarda nese primeiro día de clase, nese novo curso.
  • Deixe que o seu fillo ou filla lle expliquen os seus temores e necesidades.
  • Preséntelle a asistencia como unha obriga, e á vez como un privilexio. Por exemplo: "Que sorte que podes ir ao cole!". Non o ameace con "xa verás xa, cando vaias ao cole", de xeito que o relacione con algo negativo e desagradable.
  • Uns días antes, e na medida do posible, comece a afacelo aos novos horarios que vai ter na escola: hora de erguerse, de xantar, de durmir a sesta, de merendar, etc.
  • Se aínda é cativo e ten o costume de durmir a sesta, e a escola non lle ofrece esta alternativa, é o momento de comezar a prescindir dela.
  • Prepare co seu fillo ou filla a carteira e todo o material necesario para o curso. Bótelle unha ollada con el aos novos libros de texto para que se familiarice con eles e esperte o interese por usalos.

O gran día

  •  É moi recomendable que o primeiro día de escola acompañe ao seu fillo ou filla. Hai que facer o posible para que sexa un día ledo.
  • Se é o seu primeiro día nunha escola nova, trate de que chegue dos primeiros. Así verá aparecer a todos os compañeiros e non se sentirá tan observado como se se presenta o último.
  • Amose alegría. Se o ve chorar ou nota algo de tristura, volverá a súa desconfianza e sensación de abandono. Sentirá que o está deixando nun lugar malo.
  • Non alongue o momento da separación. Sexa afectuoso, pero sen excesos, e breve. Aínda que o seu fillo ou filla choren ou berren, a despedida debe ser rápida e sen dramatismos; de non ser así, aprenderán a usar as choromicadas como estratexia para alongar a entrada á clase.
  • En ningún caso lles prometa cousas que non vaia cumprir, como "Vou aparcar o coche e volvo!". Se o neno ou a nena se senten enganados, é máis difícil que confíen en vostede.
  • Cando o vaia recoller sexa moi puntual. Pódese sentir abandonado ao ver como marchan os seus compañeiros de clase.
  • Se ve que ten os ollos vermellos de chorar, non faga ningún comentario compadecéndoo. Só conseguirá que siga chorando no cole, agardando a súa nai ou papá salvador.
  • Fágalle comentarios presupoñendo que se portou moi ben, e remarcando as vantaxes de que fora ao colexio, como se dun privilexio se tratase.

A rutina da adaptación

  • Aproveite as fins de semana que aínda quedan do verán para pasalo ben facendo cousas divertidas. Organice actividades de lecer, e non rompa coa rutina do verán de súpeto.
  • Aínda que ao comezo os choros son normais, permaneza en contacto directo co profesorado para saber como se desenvolve o período de adaptación, se o neno ou a nena participan nas actividades e se, en xeral, se integran adecuadamente. De non ser así, deberá buscar o mellor xeito de axudalos a conseguilo. Algúns nenos e nenas poden precisar un trimestre para adaptarse.
  • Ata que superara o período de adaptación, convén que a asistencia á escola sexa o máis rutineira posible: mesmos preparativos, mesma hora de chegada e de recollida...
  • No período de adaptación hai que facer o posible por levalo todos os días. Non debe deixar de acudir á clase de maneira habitual, porque pode tardar máis en adaptarse.
  • Fóra do horario lectivo, intente que quede con algún compañeiro de colexio. Ver os seus amigos e amigas da escola infantil noutros lugares (o parque, a casa, etc.) aumentará o seu desexo de reencontrarse con eles na clase.
  • Dedíquelle todo o tempo que poida os primeiros días, e prepare pola tarde a volta ao día seguinte, para que cada mañá non se converta nun desgusto.
  • Non o deixe trasnoitar. Un neno fatigado ten máis problemas de comportamento e maiores dificultades de adaptación.
  • Érgao con antelación. Ir co tempo xusto polas mañás provoca nerviosismo no neno. E máis se é dos que espertan de mal humor.
  • Amose interese polos seus avances. Pregúntelle pola escola en momentos tranquilos, durante a noite ou na hora do baño, pero non o force a falar.

Outros servizos


Buscar en

Información de Copyright e aviso legal

Visita nuestro canal Eroski Consumer TV

En EROSKI CONSUMER tomámosnos moi en serio a privacidad dos teus datos, aviso legal. © Fundación EROSKI

Fundación EROSKI

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto