A comunidade de propietarios non remite a acta da última reunión

Na última Xunta de Propietarios do meu inmoble tomáronse acordos de importancia e levantouse acta dun asunto que afecta á miña muller (lesións por golpe producido por ascensor da comunidade) e que está nos xulgados. A pesar de que transcorreu case un mes, aínda non recibimos a acta. Soliciteina por escrito ao presidente e ao administrador, pero sen éxito. Podo actuar legalmente no suposto de que se neguen a facilitarme o solicitado?

 A Acta das reunións de comunidade debe ser remitida aos propietarios (artigo 19 da Lei de Propiedade Horizontal) no domicilio sinalado para citacións e notificacións, que adoita ser o propio piso ou local no edificio. Ademais, o administrador debe custodiar a documentación da comunidade a disposición dos propietarios (artigos 19 e 20.e da lei de Propiedade Horizontal). Cando se nega a facilitar ao propietario a consulta do Libro de Actas ou o acceso á documentación da comunidade, está incumprindo as obrigas que lle impón a lei. Nestes casos o propietario afectado debería solicitalo por escrito ao presidente e ao administrador, xestión xa realizada. Se o fixo por carta ordinaria, recoméndase que reitere a súa solicitude por buro fax certificado con xustificante de recibo. Amais, na próxima reunión pode poñelo en coñecemento da Xunta de Propietarios para que a reclame ao administrador.

Se non obtén resposta ao seu pedimento poderá acudir aos tribunais interpondo o que se denominan Dilixencias Preliminares fronte a quen teña no seu poder a acta. Necesitaría un avogado que o asista nestas dilixencias e, como son dilixencias preparatorias de xuízo, na solicitude ao Xulgado deberá expresar os seus fundamentos, o seu interese lexítimo e xusta causa respecto ao obxecto do xuízo que se queira preparar. No caso citado, como o asunto das lesións da muller do afectado se atopa nos tribunais, suxerímoslle que fale co avogado que defende os seus intereses por se se estivese a tempo, nese mesmo xuízo, de realizar o requirimento á comunidade para achegar a ese xuízo o Libro de Actas ou a acta do seu interese.

Relacións deste contido