Un banco marca xuros usureiros nun crédito

 Un consumidor concertou cun banco o financiamento dunha vaporeta no ano 1997. Aboou parte das cotas mensuais, pero deixou pendente de pagamento unha parte do préstamo. O banco demandouno, pero o consumidor argumentou que o xuro pactado era usureiro. En consecuencia, o consumidor solicitaba que se estimase só parcialmente a demanda, declarando a nulidade do contrato, co efecto de que el tivese que pagar tan só a suma recibida pendente de amortización. A Audiencia Provincial de Madrid, en sentencia do 7 de febreiro do 2005, ditou que había que considerar os xuros, catro veces superiores ó, daquela, xuro legal dos cartos, sen dúbida ningunha excesivo e, polo tanto, condición abusiva de crédito por atentar contra a boa fe e o xusto equilibrio entre os dereitos e obrigas das partes. Nesta sentencia optouse pola opción máis favorable ó consumidor, a nulidade do contrato, e non pola nulidade da cláusula relativa a tipos de xuro, polo que o consumidor só tivo que devolver a cantidade recibida pendente de amortización.

Relacións deste contido