Unha operadora de telefonía quitoulle clientes a outra con prácticas fraudulentas

 Unha operadora de telefonía demandou a outra por competencia desleal. Alegou que realizara a preasignación de varios dos seus abonados sen contar co permiso do cliente, tal e como esixe a lei, e presentou denuncias de abonados. Aínda que perdeu en primeira instancia, a Audiencia de Barcelona, en sentencia do 9 de febreiro do 2005, deulle a razón.

Na resolución sinalouse que a preasignación telefónica -o abonado pode elixir un operador diferente do que prové o acceso sen necesidade de marcar previamente o código que o identifica- debe partir do cliente, que llo comunicará ó operador desexado para que llo comunique ó anterior e así se faga efectiva. Ademais, a Comisión do Mercado de Telecomunicacións especifica que o cambio de operador por preselección só debe comezar co previo consentimento escrito do abonado, algo que non existía nos casos denunciados.

Esta práctica da operadora implicou a competencia desleal, ataque ó principio de igualdade de oportunidades e ó funcionamento do mercado, polo que foi condenada a cesar nestas accións con carácter inmediato, á anulación das condutas levadas a cabo e a publicar esta sentencia en dous xornais de alcance nacional.

Relacións deste contido