O banco omitiu información nun investimento que resultou falido

 Unha consumidora tiña os seus aforros a prazo fixo nun banco a un 3% de xuro anual. O subdirector da súa sucursal propúxolle investir os seus aforros noutro produto que ofrecía un 5,15% anual, pero omitiu información sobre aspectos esenciais do novo investimento, como o risco de non acadar rendibilidade ningunha ou a posibilidade de que o propio capital investido puidese diminuír en atención ós riscos do mercado, como de feito aconteceu. Por todo iso demandou o banco e reclamou 5.284 euros polas perdas sufridas co erróneo asesoramento financeiro e ganou o xuízo.

En sentencia do 15 de novembro do 2004, o Xulgado de Primeira Instancia número 15 de Palma de Mallorca constatou que o perfil da consumidora era o dunha investidora conservadora e así lle constaba ó banco. Ademais, non foi ela quen se dirixiu ó banco solicitando o cambio de investimento, senón que o banco lle ofreceu o cambio de maneira intencionada para que investise no produto que máis lle interesaba á entidade grazas a unha información deficiente.

Esta omisión de información esencial sobre o produto financeiro era contraria á boa fe. Por todo iso, condenouse o banco a entregarlle á afectada a cantidade perdida de 5.284 euros máis xuros.

Relacións deste contido