Unha nena caeu dun muro situado nunha praza pública

 Unha nena de once anos, cando xogaba nunha praza á saída da escola, subiu a un muro pequeno de acceso a un aparcadoiro. Caeu e rodou polas escaleiras abaixo, o que lle provocou diversas feridas, das que tardou en sandar 90 días, amais de secuelas de tipo estético. Os pais consideraban que a caída se debeu a unha deficiente construción do muro, polo que demandaron ó Concello.

Segundo o Tribunal Superior de Xustiza de Cataluña, en sentencia do 13 de maio do 2004, a baixa altura do muro posibilitaba o uso para xogar na praza de maneira habitual. Pero di que, como a miúdo pasa neste tipo de accidentes, a responsabilidade hai que atribuíla a varios focos causais. O primeiro, e principal, foi a propia imprudencia da nena, tolerada pola nai ou non controlada por ela, por utilizar para os seus xogos un elemento construtivo que tiña outra finalidade, é dicir, que non estaba á disposición das persoas que usaban a praza como lugar para os seus xogos. Por iso, o Tribunal só lle imputa ó Concello o 20% da responsabilidade nos danos causados e condénao a indemnizar a menor coa cantidade de 4.374 euros e non o total reclamado.

Relacións deste contido