Detectar a tempo as avarías do automóbil: Que lle pasa ó meu coche?

  Prestarlles atención a algúns ruídos e sensacións estrañas do noso vehículo pódenos aforrar tempo e cartos. Unha leve vibración no volante pódenos indicar que unha roda está desequilibrada, un pneumático pouco inflado ou un amortecedor defectuoso. Cando detecte algún problema, non o dubide, acuda a un profesional da reparación. A súa seguridade e mais a dos demais está en xogo.

Motor

• Se a cor do fume que sae polo tubo de escape é negro, o seu coche consome máis carburante do necesario e contamina en exceso.
• Se é de cor branca azulada, indica que o seu vehículo consome demasiado aceite.
• Se percibe un ruído semellante ó dunha máquina de coser, se cadra o motor ten máis espazo do normal entre un ou varios taqués -elementos mecánicos que transmiten a acción da árbore de levas ás válvulas de admisión e escape- e a válvula.
• Se o coche non arranca e nota unha especie de gargarexo do motor cando vira a chave, pode ser que as vasoiriñas do motor de arranque estean pegadas.

Transmisión/embrague

• Se cando sae en primeira se produce un cloc, cloc, de maneira continua e prolongada, é posible que teña un problema coa punta da transmisión, tamén chamada xunta homocinética.
• Revise o embrague se ó pisar o pedal de embrague a fondo e seleccionar unha velocidade se produce un ruído metálico (as velocidades rascan).
• Se co pedal de embrague solto, pisa o acelerador e o motor sobe de revolucións pero o coche non alcanza a velocidade correspondente, é que o embrague patina ou que o cable que transmite a acción do pedal está roto.

Pneumáticos

• Se o volante vira con menos facilidade ca decote, se cadra é debido a que as rodas dianteiras están pouco infladas, a que o engraxamento da dirección non é o idóneo ou a que o coche vai moi cargado.
• Se vibra sensiblemente en empedrado, pode haber exceso de presión nos pneumáticos dianteiros ou unha carga excesiva.
• En caso de que o volante sufra unha leve vibración, como se batese constantemente, cando estea rodando sobre un pavimento ben asfaltado, pode que unha das rodas dianteiras estea desequilibrada.
• Se o coche se desvía cara a un lado, unha roda dianteira está frouxa, os pneumáticos están gastados desigualmente ou a roda está freada, a carga mal repartida ou a mangueta falseada, nese caso convén comprobar a aliñación do eixe.

Freos

• Se observa alteracións de dureza cando pisa o pedal é posible que exista aire nos tubos, polo que convén purgar o circuíto.
• Se o seu vehículo se desvía da súa traxectoria cando frea, ou unha roda frea máis ca outra, as pastillas e zapatas están porcas ou impregnadas de aceite.
• Se na freada se produce un escorregamento no canto dunha fricción, acompañado dunha vibración que produce unha especie de chío, é que a superficie da pastilla ou do disco cristalizou.

Dirección

• Se nota dureza pode ser por unha baixa presión dos pneumáticos dianteiros, unha anchura maior á recomendada, o mecanismo da dirección gastado ou amortecedores en mal estado.
• Se o seu coche ten dirección asistida e renxe é por falta de líquido.
• Se o seu vehículo tende a ir cara a un lado pode ser pola distinta presión nos pneumáticos dianteiros.

Amortecedores

• Revise o estado dos amortecedores se:
• cando frea observa que o morro do vehículo se inclina en exceso ou cando o vehículo absorbe con excesiva violencia as alteracións do terreo.
• cando en terreo irregular e de noite os faros vibran demasiado.
• co vento lateral o vehículo vai dando bandazos.
• os pneumáticos se desgastan de xeito irregular.
• Se o volante vibra cando se frea en curvas, pode que o amortecedor dianteiro do lado exterior da viraxe estea defectuoso, ou que a bésta dese lado se atope en mal estado.
• Se escoita ruídos bruscos, localizados na parte dianteira ou traseira, pódese deber a roturas do amortecedor ou de elementos de suxeición próximos ou a silentblocks -pezas de goma interpostas entre dúas metálicas- en mal estado.

Relacións deste contido