Carne de porco: Tan sa coma outras carnes

 Ata hai ben pouco expertos en nutrición e saúde recomendaban un consumo limitado e máis ben ocasional da carne de porco -como acontecera co ovo-, alegando que se trataba dunha carne moi graxa e rica en colesterol. Non obstante, investigacións dos últimos anos puxeron de manifesto que esta carne é tan sa coma o resto e, ademais, descubriron que a súa graxa é a máis rica en ácidos graxos monoinsaturados. Deixando a un lado a calidade desa graxa, tamén pola súa cantidade é recomendable a carne de porco: hai pezas moi magras, como a cinta e o solombo, que conteñen menos graxa cá que achega un filete de vitela.

Rico en graxas monoinsaturadas

Arredor do 48% da graxa porcina son ácidos graxos monoinsaturados do tipo ácido oleico; característico do aceite de oliva. A inxestión deste tipo de graxa contribúe a reducir os niveis de colesterol total en sangue a expensas do chamado colesterol malo ou colesterol LDL e a aumentar os niveis do chamado colesterol bo ou colesterol HDL. O certo é que os ácidos graxos saturados, os que consumimos en exceso resultan nocivos para o corazón, representan unha porcentaxe inferior con respecto a outras carnes. Por este motivo o porco constitúe, xunto coas aves sen pel ou o coello, unha boa alternativa de consumo de porco que non implica unha inxestión elevada de graxa e que tampouco incide de xeito negativo nos niveis de colesterol en sangue. No tocante ó colesterol, as pezas máis magras achegan entre 60 e 80 miligramos por cada 100 gramos, unha cantidade inferior á que presentan o año ou o vacún.

Boa fonte de proteínas

  A carne de porco achega unha media de 18 a 20 gramos de proteínas por cada 100 gramos, cantidade que depende da especie animal (porco branco ou ibérico, máis graxo este último), a súa idade e da peza de carne de que se trate. Canto máis novo é o animal, máis tenra e branda é a carne, se ben a súa achega de nutrientes é menor cá dos exemplares adultos.

• Leitón: macho ou femia de poucas semanas, alimentado só con leite materno. Adoita ter unhas tres semanas de vida.
• Bacoriño: porco de poucos meses que se segue alimentando de leite materno, pero co dobre de peso có bacoriño, chegando a pesar 5,5 quilos.
• Porco: exemplar adulto, macho ou femia. Sacrifícase ós 10 meses e o seu peso oscila entre os 100 e 150 quilos.

En relación coas diferentes pezas do animal, as partes dianteiras son ricas en tecido conxuntivo (compoñente de pel, ósos, tendóns, ligamentos...). Nel abunda unha proteína chamada coláxeno, de escaso valor biolóxico pola súa pobreza en aminoácidos esenciais. O coláxeno transfórmase en xelatina por acción da calor, motivo polo que ás pezas dianteiras lles cómpre unha cocción máis prolongada ca ás traseiras.

Variedade de minerais e de vitaminas

A carne de porco contén minerais como ferro de doada absorción ou ferro hemo (presente en animais de sangue quente e peixe, o que máis se aproveita), cinc, fósforo, sodio e potasio. Destaca a súa achega de vitaminas do grupo B, en especial da vitamina B1 ou tiamina. Contén entre 8 e 10 veces máis tiamina có resto de carnes. Esta vitamina cumpre con funcións moi importantes no organismo: estimula o metabolismo e intervén no bo funcionamento do sistema nervioso. Ademais, a carne de porco é máis rica en biotina, ácido pantoténico, riboflavina e piridoxina cá doutras carnes, e nela tamén está presente a vitamina B12.

Táboa de composición nutricional por 100 gramos de porción comestible

Peza de carne	Calorías	Proteínas (gramos)	Graxa total (gramos)
Porco magro	155	20,0	8,3
Porco semigraxo	273	16,6	23,0
Porco graxo	327	15,4	29,5
Touciño entrefebrado	469	12,5	46,6
Touciño	673	8,4	71,0

Peza de carne	Ácidos graxos saturados (gramos)	Ácidos graxos monoinsaturados (gramos)	Ácidos graxos poliinsaturados (gramos)
Porco magro	2,9	3,3	0,6
Porco semigraxo	8,0	9,0	1,6
Porco graxo	11,3	11,6	2,0
Touciño entrefebrado	17,4	19,1	3,1
Touciño	26,3	29,2	4,8

Relacións deste contido