Utilizaron a súa tarxeta de crédito roubada e a caixa négase a indemnizarlle todos os gastos

 A un usuario dunha tarxeta de crédito subtraéronlle esta mentres se atopaba nun ximnasio. Comunicoulle o roubo á súa caixa de aforros ese mesmo día. Aínda así a tarxeta foi utilizada tanto en extracción de cartos en caixeiros automáticos coma na realización de compras en diversos establecementos. A caixa non lle aboou ó usuario o total subtraído, senón só 60 euros. Non conforme, o usuario demandou a caixa e reclamou os 505 euros restantes. A caixa alegou que non procedía indemnizar o seu cliente porque para que as persoas que lle subtraeron a tarxeta puidesen facer uso do PIN, o usuario debeu incorrer en neglixencia ó facilitalo, ben por ir unido o PIN á súa documentación ou ben por ser este o resultado de datas de nacemento que facilitasen o seu coñecemento. Pero o Xulgado Número 49 de Madrid, en sentencia do 5 de abril do 2003, considerou que o usuario ten dereito a ser indemnizado polas perdas e danos. Sinala que quen subtraeu a tarxeta puido copiar o PIN no caixeiro xa que as instalacións non aseguran o segredo das operacións. E con estas argumentacións, o Xulgado condena a caixa a indemnizar coa cantidade de 505 euros.

Relacións deste contido