O redondeo do xuro do crédito hipotecario era incorrecto

Un usuario tiña contratado cunha caixa de aforros un crédito hipotecario variable. A cláusula do contrato sobre o cálculo do tipo de xuro sinalaba que quedaba suxeito ás variacións tanto á alza coma á baixa que se produciran, segundo o tipo de xuro de referencia publicado periodicamente no BOE. Os demandantes non estaban conformes coas liquidacións da caixa e realizaron unha reclamación á Oficina de Atención ó Cliente da entidade bancaria, que desestimou a reclamación. Os demandantes solicitaron daquela a intervención do Servizo de Reclamacións do Banco de España, que fixo constar que a caixa non se axustou ós bos usos e prácticas bancarias ó aplicar de xeito unilateral o seu criterio na revisión do tipo de xuro. Finalmente acudiron a xuízo para reclamar cantidades. Segundo o Xulgado Número 36 de Madrid, en sentencia do 29 de decembro do 2003, a caixa nunca redondeara á baixa e ó tipo de xuro sumáraselle, ademais, un 1% sen que isto estivese amparado pola cláusula do contrato. Por todo iso estima a demanda ó apreciar unha aplicación incorrecta por parte da caixa do tipo de xuro nun 1% máis, que deberá ser deducido de tódolos recibos aboados.

Relacións deste contido