Múltiples problemas nunhas vivendas novas

Merquei un piso de nova obra, pero desde o comezo hai unha chea de problemas no edificio: non podemos usar os garaxes; aínda non dispomos de ascensor; as zonas comúns atópanse deterioradas; aínda non se formou a comunidade de veciños; en varias casas non hai portas interiores, xa que comezaron a cambialas hai seis meses e os carpinteiros non volveron aparecer. Non fago máis que chamar o promotor, que nunca dá a cara e asegura que é problema do construtor.

  Pódese solicitar información nos Servizos de Consumo do Concello ou da Comunidade Autónoma. Respecto ó feito de que o promotor non formou a comunidade de propietarios, é aconsellable que se comprobe no Rexistro da Propiedade que corresponda á finca a inscrición do título constitutivo do réxime de propiedade horizontal.

No tocante á edificación defectuosa en garaxes, ascensor, portas de vivendas e en elementos comúns, é conveniente un informe pericial que determine os defectos e obras que cómpre realizar co fin de requirirlles fidedignamente ó promotor e ó construtor a súa realización.
En caso de non acadar un acordo extraxudicial, o paso seguinte é acudir á vía xudicial. A responsabilidade de construtor, arquitecto, aparellador e, en xeral, de tódolos que interviñeron no proceso edificatorio é solidaria, non sendo que se dea determinado e individualizado pericialmente a concreta responsabilidade imputable a cada un deles. É importante que non se deixe transcorrer o tempo e que se lles comunique ós veciños, dado que conforme á Lei de Ordenación da Edificación, a garantía para algúns defectos é dun ano que conta desde a acta de recepción de obra, para outros é de tres anos e, para rematar, para os que afecten ós alicerces e á estrutura do edificio, de dez anos. A acta de recepción de obra debe estar incluída no Libro do Edificio. Se se ten algún problema ó respecto, hai que lle solicitar esta documentación ó promotor e consultar no Departamento de Vivenda / Urbanismo do Concello no que estea situada a vivenda. Para rematar, interesa máis que a reclamación a exercite o presidente da comunidade, polo que se se precisa axuda para a constitución dos órganos comunitarios, hai que solicitarlla a un avogado ou a un administrador de fincas.

Relacións deste contido