Pódese cambiar o coche novo se este se avaría ós seis días?

Merquei un coche novo e ós seis días, con só 254 quilómetros percorridos, o motor xa non arrincaba. No taller reparárono e o arranxo durou outros oito días. Todo iso nun coche mercado nun concesionario e cunha garantía de dous anos. Teño dereito a esixir o cambio do vehículo por outro novo, no canto de arranxar este?

 Cando un consumidor merca un produto nun establecemento ten dereito a que estea en perfecto estado e que funcione correctamente conforme ó que habitualmente cabe esperar del, consonte ó indicado polo vendedor, o sinalado na publicidade, na oferta, nas etiquetas e no contrato sobre as características, calidades e prestacións propias do produto.

De acordo coa Lei de garantías, o vehículo dispón dunha garantía de dous anos a contar desde a data de compra, pero os oito días que durou a reparación non se contan no computo do prazo. No momento en que o motor deixou de funcionar, o usuario tiña dereito a optar entre a reparación ou a substitución do vehículo por outro novo. Aceptou a reparación e o vehículo funciona de maneira óptima. Polo tanto, nestes momentos xa reparou o vehículo e non ten dereito a reclamar un vehículo novo en substitución do adquirido. Pero quizais tampouco tería este dereito no momento oportuno, porque a lei non permite optar pola substitución cando esta resulte desproporcionada en relación á reparación.

Neste caso, a reparación era posible e viable, deu resultado e probablemente o seu custo era inferior á substitución, polo que consideramos que a reparación era a opción adecuada á legalidade. Hai que ter en conta que actualmente funciona e que está en perfecto estado. Agora ben, se a mesma avaría volve xurdir, pódese considerar o cambio de vehículo, alegando que a reparación non deu resultado máis ca temporalmente.

Pódese acudir a unha Oficina Municipal de Información ó Consumidor ou a un avogado para que medien entre ambas as partes. De modo xeral, aconséllase deixar constancia escrita de todas as avarías dos produtos, das entradas en talleres de reparación en garantía e das queixas do consumidor mediante Follas de Reclamacións.

Relacións deste contido