A operación de cirurxía estética nos seos non saíu como estaba previsto

 Unha muller someteuse a unha operación de cirurxía estética nos seos para colocarlles uns implantes de silicona e disimular cicatrices. Como consecuencia da intervención medraron as cicatrices e volvéronse antiestéticas, o que á súa vez lle causou problemas psicolóxicos severos nas súas relacións profesionais, persoais, familiares e sexuais. Como consideraba que non foi previa e debidamente informada dos riscos da intervención, presentou unha demanda contra a clínica. Di o Supremo, en sentencia do 22 de xullo do 2003, que en medicina voluntaria a relación contractual entre médico e paciente se asemella a un arrendamento de obra, no sentido de que se intensifica a obriga ou garantía de obte-lo resultado perseguido. Ademais, a xurisprudencia imponlle ó médico unha obriga de información á cliente, que se incumpriu, sobre os eventuais riscos previsibles, e incluso frecuentes, para que ela os puidese valorar. O Supremo condena a clínica a indemniza-la cliente polas perdas e danos causados.

Relacións deste contido