A reportaxe da voda non se ve no meu DVD

Para a miña voda decidimos encargar unha reportaxe de vídeo en DVD. Hai unha semana entregáronmo e cando me dispuxen a velo na casa comprobei que non funcionaba. Acudín á empresa na que nos fixeron a reportaxe e dixéronme que non é problema do DVD que me gravaron, senón do meu lector de DVD. Ó parecer eles gravan cun formato que algúns DVD non len, pero resulta que o meu DVD é un Pioneer, coma a máquina coa que se gravou o DVD. Ademais probei no lector de DVD dun amigo e tampouco o le. ¿Pódolles esixir que me devolvan os cartos?

  Segundo os artigos 1101 e seguintes do Código Civil, procedería unha indemnización por perdas e danos, xa que se privaría da posibilidade de conservar en imaxes o enlace matrimonial. E no tocante á información de que algúns DVD non visualizan a gravación, incumbíalle á empresa o deber profesional de coñece-las circunstancias e de advertir previamente diso ó consumidor. Este deber de información está recollido na Lei Xeral para a Defensa dos Consumidores Usuarios.

Suxerimos poñerse en contacto coa empresa co fin de comproba-la correcta lectura do disco noutro modelo doméstico de DVD distinto do que dispoña a empresa. Soliciten a entrega por escrito (burofax certificado con xustificante de recibimento) dos datos relativos ó formato no que a empresa alega que realizou a gravación e ás características técnicas do lector axeitado. É recomendable que se poña en contacto coa Oficina Municipal de Información ó Consumidor para interpor unha reclamación e intentar alcanzar un acordo.

Se das xestións anteriores resultase que a empresa non acredita a lectura do disco noutro modelo de DVD, haberá que instalo á devolución íntegra do prezo aboado, devolvendo a película, máis unha cantidade en concepto de perdas e danos polo dano moral que este incumprimento de contrato comporta.

Se, pola contra, a empresa acredita a correcta lectura noutro modelo de DVD doméstico dos habitualmente ofertados no mercado a usuarios non profesionais, cuestionaríase a relevancia da ausencia de información ó respecto, pois é obriga do profesional proporcionarlle ó consumidor unha información veraz e completa sobre o obxecto do contrato. E se non hai un acordo satisfactorio o aconsellable é acudir á vía xudicial, pois tamén hai cumprimento defectuoso e dano moral.

Relacións deste contido