Amputouse un dedo coa porta dunha discoteca

A miña filla de 16 anos amputouse a falanxe distal do dedo maimiño da man esquerda coa porta do servicio dunha discoteca. Saía do servicio e suxeitaba a porta para que non se lle pechase ó de detrás, pero chegou un momento en que non puido aguantar máis e a porta pechouse, xa que é unha porta grande de ferro. Á parte do trauma do momento e do que sofre agora, precisa unha operación de restauración e témo-lo informe médico que o xustifica. A miña pregunta é se o seguro de responsabilidade civil que se supón que posúe a discoteca se debe facer cargo de todo isto.

 Se se considera que o dano se debe á culpa ou á neglixencia do titular do establecemento, a responsabilidade será deste e, polo tanto, con obriga de indemniza-los danos causados. Di o artigo 1902 do Código Civil que o que por acción ou por omisión lle cause un dano a outro, intervindo culpa ou neglixencia, está obrigado a repara-lo dano causado. E de haber responsabilidade, a indemnización debe comprende-lo dano causado, físico e moral, as secuelas que puidesen quedar, os gastos médicos e os días que tarde en recuperarse. Tamén se debe dar, e probarse, unha relación de causa-efecto entre as características e localización da porta e o dano, é dicir, que non se poida achaca-la lesión a outras circunstancias como, por exemplo, á intervención dun terceiro. Establecida a relación de causalidade cómpre determinar se a instalación dunha porta de ferro, pesada e de gran dimensión no acceso ós baños é ou non neglixente. Pero antes de someter esta cuestión ó criterio xudicial, haberá que intentar, a través dun avogado, alcanzar un acordo coa compañía de seguros.

Se non se alcanza o acordo, poderíase considerar acudir a xuízo. O Regulamento de Policía de Espectáculos Públicos e Actividades Recreativas e diversas normativas sobre edificios establece que queda prohibida a colocación de portas de corredoira e de dobre acción que estreiten o van das portas ou dificulten o paso ou libre circulación do público. A partir de aí, cabería interpretar que unha porta como a que se describe non cumpre a normativa pois é de difícil manexo, dificulta o paso e a libre circulación do público e que, neste sentido, a instalación da porta con tales características e consecuencias é unha neglixencia do responsable da discoteca.

Relacións deste contido