O avogado presentou o recurso fóra de prazo

Dous clientes acudiron a un avogado para a defensa xurídica dos seus intereses. O preito perdeuse, pero o avogado aconsellou interpoñer un recurso ante o Tribunal Supremo. Así se fixo, pero fóra de prazo, polo que o Tribunal dictou un auto poñéndolle fin ó procedemento. Considerando que a actuación do avogado fora neglixente, os dous clientes presentaron unha demanda contra el e contra a súa compañía de seguros, reclamando unha indemnización pola cantidade que pretendían solicitar no recurso, algo máis de 36.000 euros cada un. Para o Tribunal Supremo, en sentencia do 4 de xuño de 2003, non se discute a neglixencia do avogado, o que se considera é se para determina-lo importe da indemnización por perdas e danos causados se deben valora-las probabilidades de éxito do recurso no caso de que este seguise adiante. Ó final, o Supremo considera imposible saber se o recurso prosperaría coas pretensións solicitadas polos clientes; sen embargo, admítese que foron privados da oportunidade de que o seu asunto fose axuizado. E por este dano moral condena o avogado e a súa aseguradora a indemnizar con 12.000 euros a cada un deles.

Relacións deste contido