Conseguen unha indemnización non pola perda da maleta, senón porque non llela entregaron

En 1998 un matrimonio viaxou con Iberia a Porto Rico. A parella facturou a equipaxe sen facer unha declaración complementaria do valor dos obxectos contidos nela. Ó chegaren ó seu destino non apareceu a maleta da muller, polo que lla reclamaron á compañía, que recoñeceu a responsabilidade do extravío e ofreceu unha indemnización de 200 dólares USA (daquela, 186,32 euros -31.000 pesetas-), cantidade rexeitada polos prexudicados, que optaron por acudir ós tribunais. Solicitaron 237.201 pesetas, ó que se negou a compañía, alegando que ó tratarse dun voo internacional se debía aplica-la normativa que limita a indemnización a 20 dólares USA por quilogramo, salvo declaración especial de valor. A Audiencia de Palma de Mallorca, na sentencia de novembro do 2000, admitiu a existencia da normativa, pero os prexudicados non lle reclamaron á compañía a súa responsabilidade en transporta-la equipaxe, senón que basearon a súa demanda no atraso neglixente para localiza-la equipaxe e entregala no hotel no que se hospedaban. E é que a Compañía non xustificou o retardo na entrega da maleta no seu destino, e crearon nos prexudicados unha afección psíquica que non lles permitiu gozar plenamente das súas vacacións, sendo a cantidade reclamada por este concepto, equivalente a tres días do total do importe da viaxe, de 199.416 pesetas. Iberia foi condenada a indemniza-la cantidade reclamada.

Relacións deste contido