Analizados 12 aeroportos: accesos, servicios, seguridade, comodidade e lecer, organización, limpeza e conservación: A maioría dos aeroportos españois máis importantes deben mellorar en comunicacións e comodidade

O mellor aeroporto para... e táboa comparativa

• Chegar ata el... O de Málaga, pola súa correcta sinalización desde a cidade, pola súa comunicación mediante transporte público, pola coincidencia deste co horario de voos e polo servicio de taxis (económico e con bo número de vehículos en servicio).
• Non perderse unha vez dentro... O de Valencia, pola facilidade de orientación nel, a esmerada e eficaz sinalética, o bo número e situación das pantallas de saídas e chegadas, o correcto funcionamento do sistema de megafonía e a diversidade de idiomas nos que se ofrece a información.
• Non abafar nas horas de espera... O de Málaga, pola comodidade das súas zonas de descanso, e pola preocupación por ameniza-las esperas (exposición de pintura e, para os máis pequenos, unha zona acondicionada de xogos).
• Realizar consultas ó persoal do aeroporto... Os de Palma de Mallorca e Santiago: amais de dispensaren unha boa atención e servicio, non amosaron obxeccións cando se lles requiriu para que os acompañasen ó lugar consultado.
• Aproveita-la espera mercando e aproveitando os servicios... O aeroporto de Madrid, no que ademais se pon á disposición do usuario unha ampla variedade de servicios entre os que salientan a presencia de máis de 30 comercios, oficinas bancarias, servicios relixiosos, gardería...
• Aparcar... Os de Pamplona e San Sebastián, xa que en ámbolos casos o aparcadoiro é gratuíto, aínda que cun pequeno inconveniente, que non están vixiados.
• Tomar un café ou un refresco na cafetería sen gastar moito... O aeroporto de Bilbao, especialmente no refresco, xa que mentres que noutros aeroportos se pode chegar a pagar máis de 2 euros, en Bilbao só cómpre aboar 1,25 euros.
• Tomar un refresco nunha máquina expendedora... De novo o aeroporto de Bilbao, no que tomar un refresco nunha máquina expendedora supón un desembolso de 1,05 euros, fronte ós 1,95 euros do aeroporto de Pamplona (o máis caro neste sentido).
• O aeroporto máis limpo e mellor conservado... O de Madrid, no que se observou un exquisito coidado, tanto das instalacións coma dos aseos.

TÁBOA COMPARATIVA

Aeroporto	Comunicación ó aeroporto 1	Adaptabilidade e organización2	Comodidade e lecer3	Servicios do aeroporto4
Alacante (Altet)	Mal	Ben	Moi Mal	Mal
Valencia (Manises)	Aceptable	Moi Ben	Mal	Ben
Málaga (Pablo Picasso)	Moi Ben	Ben	Excelente	Moi Ben
Pamplona (Noain)	Moi Mal	Moi Ben	Mal	Aceptable
Madrid (Barajas)	Ben	Ben	Ben	Moi Ben
Gran Canaria (Gando)	Mal	Ben	Mal	Ben
Barcelona (El Prat)	Aceptable	Moi Ben	Moi Mal	Ben
Palma de Mallorca (Son San Juan)	Mal	Moi Ben	Mal	Moi Ben
Bilbao (Loiu)	Mal	Aceptable	Moi Mal	Ben
Santiago (Lavacolla)	Mal	Ben	Mal	Aceptable
San Sebastián (Hondarribia)	Ben	Moi Ben	Excelente	Aceptable
Sevilla (San Pablo)	Moi Ben	Moi Ben	Mal	Aceptable
Termo medio	Mal	Ben	Mal	Ben

Aeroporto	Estado de limpeza e conservación5	Seguridade do aeroporto6	Total
Alacante (Altet)	Aceptable	Excelente	Aceptable
Valencia (Manises)	Ben	Moi ben	Ben
Málaga (Pablo Picasso)	Ben	Moi ben	Moi Ben
Pamplona (Noain)	Excelente	Ben	Aceptable
Madrid (Barajas)	Excelente	Excelente	Moi Ben
Gran Canaria (Gando)	Excelente	Excelente	Ben
Barcelona (El Prat)	Aceptable	Mal	Aceptable
Palma de Mallorca (Son San Juan)	Aceptable	Ben	Aceptable
Bilbao (Loiu)	Excelente	Moi ben	Aceptable
Santiago (Lavacolla)	Moi Ben	Moi ben	Ben
San Sebastián (Hondarribia)	Aceptable	Ben	Ben
Sevilla (San Pablo)	Aceptable	Excelente	Ben
Termo medio	Moi Ben	Moi Ben	Ben

1.- A comunicación do aeroporto: Analizouse o custo do taxi desde o centro da cidade ó aeroporto, a existencia de suficiente sinalización tanto á saída da cidade coma nas proximidades do aeroporto. Estudiouse tamén se o aeroporto está ben comunicado no tocante a transporte público, se coinciden os horarios de aeroporto co primeiro e último voo e a existencia de taxis en número abondo para cubri-las chegadas a cada un dos aeroportos.

2.- Adaptabilidade e organización: Neste bloque estudiouse a adaptabilidade dos aeroportos para persoas minusválidas e invidentes. Analizouse tamén a indicación do horario do aeroporto, a existencia de frechas ou indicadores de dirección, a facilidade de orientación no aeroporto, a existencia de pantallas indicadoras de saídas e chegadas, o correcto funcionamento do sistema de megafonía e os idiomas nos que se ofrece toda a información.

3.- Comodidade e lecer: Estudiouse a existencia de zonas onde poder sentar e que non pertenzan a comercios ou hostalería, o seu número, se están repartidas convenientemente polo aeroporto e a súa comodidade. Ademais, analizouse a existencia dalgún sistema gratuíto para ameniza-la espera.

4.- Servicios do aeroporto: Neste bloque analizáronse os diferentes servicios do aeroporto. Neste sentido comprobouse a existencia de persoal de atención ó público (chaquetas verdes de Aena), a súa amabilidade e a calidade da súa información e a atención ó usuario no tocante a se o acompañan ó lugar requirido. Tamén se estudiou a existencia de consignas e o seu prezo, a existencia de carriños portaequipaxes en lugares estratéxicos e en qué número, e a posibilidade de plasma-las queixas do usuario, a situación deste sistema, se facilitan as follas de reclamacións sen obxección e a atención dispensada, e a existencia da Carta dos Dereitos dos Pasaxeiros da Unión Europea e a súa localización. Ademais observouse a presencia de cambiadores de bebés e a súa localización (aseos de señoras, de cabaleiros, en ámbolos dous, ou en aseos específicos para este mester), o prezo dun café e dun refresco en cafeterías e máquinas expendedoras de habelas, así como unha análise do resto de servicios do aeroporto incluído o aparcamento.

5.- Estado de limpeza e conservación: Estudiouse o estado hixiénico, de conservación, e a iluminación tanto do aeroporto en xeral coma dos aseos; ademais nestes últimos comprobouse o completo equipamento. Estudiouse tamén a presencia de papeleiras, o seu número, o seu estado e se están ou non preparadas para a reciclaxe.

6.- A seguridade do aeroporto: Neste bloque comprobouse a existencia de equipos contra incendios, persoal de seguridade e outro tipo de sistemas (como cámaras de vídeo), a sensación de seguridade do aeroporto, a correcta indicación das saídas de emerxencia, a existencia de indicacións ou instruccións en caso de emerxencia, a presencia dun servicio de asistencia sanitaria, a prohibición de fumar e o seu cumprimento.

Relacións deste contido