O dano foi debido á impericia do escolar

Unha escola pública de Logroño organizou unha viaxe de estudios á praia do Ebro para alumnos do sétimo curso da EXB. Acompañaban ós escolares catro profesores do centro. Unha mañá todo o grupo acudiu á praia e tres alumnos solicitáronlles permiso ós mestres para alugar un patín de pedais. O permiso foilles concedido a condición de non se afastaren moito e estaren sempre en augas onde fixesen pé. Un dos alumnos escorregou ó descender do patín e levou un golpe na cintura coa barra de protección. Polos danos sufridos os seus pais solicitáronlle á Administración unha indemnización de dez millóns de pesetas, que foi denegada. Levado o asunto ante o Supremo, desestimouse de novo porque, segundo dicta a sentencia do 3 de decembro do 2001, a pesar do carácter obxectivo da responsabilidade patrimonial da Administración Pública, cando é a conducta da víctima a determinante do dano non se lle pode imputar á Administración o infortunio ou a neglixencia. Nesta ocasión o alumno esvarou ó arribar á beira, pero estímase que o dano sufrido se debeu á impericia da propia víctima.

Relacións deste contido