O concesionario tivo que devolve-lo prezo do vehículo novo defectuoso

Un consumidor adquiriu en agosto de 1999 un vehículo novo da marca Nissan. Desde o comezo presentou avarías reiteradas sempre relacionadas coa dirección. Os talleres do concesionario, como a avaría non se solucionaba, deriváronlle o problema ó fabricante, pero este negou calquera disfunción no vehículo. Finalmente, o consumidor demandou ó vendedor, solicitándolle a devolución do prezo aboado, restituíndo o vehículo. Para a Audiencia Provincial de Lleida, e así o dicta na súa sentencia do 20 de xuño do 2001, era evidente que o funcionamento do vehículo distara de ser óptimo xa que se acreditou que se desviaba cara á dereita dun xeito notorio abondo como para que non fose aceptable nun vehículo de nova adquisición. Estimou a demanda do consumidor e aplicou o artigo 11 da Lei Xeral de Consumidores e Usuarios, que di: se a reparación efectuada non é satisfactoria e o obxecto non cumpre as condicións óptimas para o seu emprego, o usuario do producto defectuoso ten dereito á substitución do obxecto adquirido por outro de idénticas características ou á devolución do prezo pagado. Así, condenou o vendedor a devolve-lo prezo do vehículo e ó pagamento das custas do xuízo.

Relacións deste contido