Indemnizan os noivos pola intoxicación sufrida polos invitados do seu banquete

Varios invitados a un banquete de vodas celebrado nun hotel sufriron umha intoxicación como consecuencia dos alimentos alí inxeridos. Os noivos reclamáronlle ó hotel umha indemnización polo dano moral causado, e con data do 19 de xaneiro do 2001, a Audiencia Provincial de Valladolid condenou o hotel a aboarlles unha indemnización de duascentas mil pesetas.

A Audiencia determina que, se ben os noivos non foron afectados pola intoxicación, o incumprimento do hotel cobraba especial relevancia e transcendencia ó se tratar dun banquete de vodas. Ademais, considera probada a relación de causalidade entre a intoxicación e o mal estado dos alimentos, a pesar de que estes xa se esgotaran e non se podían analizar. Sinala a Audiencia que, ó se acabaren os citados alimentos, adquiriron especial relevancia as declaracións das testemuñas invitadas á voda.

E neste caso, canda a proba dos invitados, presentouse o testemuño dunha doutora que prestou asistencia médica a un dos asistentes ó banquete. Finalmente, a Audiencia lembra que o día anterior á voda, outras dúas parellas que celebraran no mesmo hotel o seu banquete nupcial se presentaran na Xunta de Castela e León para denunciar feitos similares e que a inspección realizada atopou xermes e enterobacterias nas mostras recollidas.

Relacións deste contido