A sociedade de gananciais pode liquidarse trala sentencia de divorcio

A miña muller e mais eu compartimos unha vivenda da que aínda seguimos pagando a hipoteca. A vivenda e a súa hipoteca seguen a nome da miña muller e do seu ex esposo. Quixera saber qué se pode facer legalmente ante esta situación.

  Un dos efectos da sentencia firme de divorcio, amais da disolución do vínculo matrimonial, é a disolución da sociedade de gananciais se a hai. Así e todo, acontece con certa frecuencia que os procesos de divorcio se encamiñan exclusivamente a obte-la ruptura do vínculo matrimonial e a adoptar medidas relativas ós fillos e ás pensións, sen que o home e a muller soliciten a liquidación da sociedade de gananciais. Neste caso, a sentencia de divorcio declara disolta a sociedade de gananciais pero non liquidada, polo que queda pendente entre os ex cónxuxes proceder ó inventario, avaliación e reparto dos bens.

Para resolver este último trámite, cómpre plasmar un acordo escrito que recolla estas cuestións. É dicir, deben inventariar, valorar e separa-los bens gananciais en dous lotes e asigna-la titularidade de cada "lote" a cada membro da parella.

Se entre os bens do inventario hai unha vivenda hipotecada e se lle asignou o seu uso a unha das partes, esta podería propoñer un acordo polo que se lle atribúa a completa propiedade da vivenda, así como tamén a carga (a hipoteca e a súa enteira obriga de pagamento).

A distribución de lotes débese realizar tratando de equipara-la posición de ámbalas dúas partes na repartición, de xeito que se a un dos ex cónxuxes se lle atribúen máis bens, este compense ó outro, por exemplo, en metálico. Se non se chega a un acordo, cómpre acudir á vía xudicial civil para liquida-la sociedade de gananciais a través dun procedemento para a división xudicial do patrimonio matrimonial.

Relacións deste contido