Os contratos de multipropiedade non se aboan dentro dos dez días seguintes á sinatura

Uns usuarios subscribiron un contrato de adquisición de multipropiedade e outro de financiamento do 100% do importe da compra. A financeira entregoulle esa cantidade á entidade vendedora dentro dos dez días seguintes á sinatura. Os usuarios, sen embargo, acolléronse ó prazo de reflexión de dez días que lle concede a lei ó consumidor e decidiron desistir do contrato sen xustificación ningunha. Pero a compra xa fora aboada, polo que demandaron á sociedade vendedora, reclamaron a cantidade paga e solicitaron a nulidade do contrato.

O xulgado de primeira instancia déulle-la razón, xa que o artigo 11 da lei 41/98 sobre multipropiedade prohíbelle ó vendedor recibir ningunha cantidade durante os dez primeiros días desde a sinatura do contrato. Polo tanto, condenou a vendedora a devolve-lo dobre do entregado e declarou nulo o contrato de compra.

Presentado o recurso de apelación ante a Audiencia Provincial de Valladolid, esta, en sentencia do 4 de decembro do 2000, confirma a primeira sentencia. A Audiencia estima que se ben o comprador pode financia-la súa adquisición cun préstamo, este queda resolto se o usuario desiste do contrato nos dez primeiros días. Ademais, a lei sobre multipropiedade, no seu artigo 11, prohíbelle ó vendedor recibir neses días cantidade ningunha, con independencia da procedencia do diñeiro.

Relacións deste contido