Un catéter defectuoso ocasionou graves lesións

Un paciente cunha lesión no dedo índice da man esquerda acudiu ó Servicio Galego de Saúde. No preoperatorio introducíuselle por vía venosa un catéter que rompeu e se trasladou ata o ventrículo dereito, aloxándose na arteria pulmonar. Debido a isto, o paciente debeu someterse a unha grave intervención cirúrxica para extraerlle o catéter, sufriu lesións das que tardou en curar 246 días, e quedoulle como secuela unha cicatriz no tórax.

O paciente demandou ó fabricante (os laboratorios Abbot), á Tesourería Xeral da Seguridade Social, ó INSALUD e ó Servicio Galego de Saúde. En primeira instancia, condenouse ós laboratorios a aboarlle ó paciente dez millóns de pesetas, e o resto dos demandados foron absoltos. Na apelación, reduciuse a indemnización a seis millóns. Así e todo, os laboratorios recorreron ó Supremo e perderon.

Di o Supremo, en sentencia do 15 de novembro do 2000, que cando aconteceron os feitos estaba vixente a Lei Xeral de Defensa do Consumidor e Usuario, que obrigaba ós laboratorios a probar que actuaron con dilixencia. Sen embargo, o Supremo estima que os laboratorios non probaron a inexistencia de defectos no catéter e que quedou acreditado que rompeu cando era usado correctamente, o que determina a obriga de repara-lo dano que se lle causou ó paciente.

Relacións deste contido