Aforrar no fogar: Claves: racionaliza-lo gasto, planifica-lo consumo e contratar tarifas económicas

  Non hai fórmulas máxicas para gastar menos, pero seranos máis doado se reducímo-lo consumo de enerxía e contratamos tarifas económicas telefónicas, eléctricas ou de gas. Tamén podemos aforrar se obtémo-lo máximo rendemento do noso consumo de auga, gas e electricidade, adaptando os fogares: acumuladores, uso de lámpadas de baixo consumo, termóstatos, burletes para portas e ventás... Outra fonte de gastos susceptible de intervención é a cesta da compra: se pensamos mellor a lista e adquirimos só o que precisamos e buscando o mellor prezo, poderemos aforrar uns cartos.

Recibos de luz e gas

• Contrate a potencia e tarifa que máis se axusten ás súas necesidades. Estudie a tarifa nocturna e avalíe se lle resulta rendible.
• Use a luz artificial só cando realmente a precise. Non deixe luces acesas en habitacións nas que non haxa ninguén. Substitúa as lámpadas convencionais por outras halóxenas de baixa voltaxe ou por lámpadas fluorescentes compactas. Proporcionan o mesmo nivel de iluminación, duran 8 veces máis e aforran ata un 80% de enerxía.
• Comprobe o consumo dos electrodomésticos na súa etiqueta enerxética. Os niveis A e B son os máis eficientes.
• Sopese a opción de substituí-los radiadores eléctricos por acumuladores de calor para contrata-la tarifa nocturna. Podería aforrar un 50% en calefacción.
• Reduza as fugas de calor, e protexa a súa casa contra o frío illándoa con dobre acristalamento e burletes (tira nas follas das portas e ventás para aumenta-lo illamento térmico). Pode aforrar entre un 20% e un 40% en calefacción.
• Procure que a temperatura da calefacción se manteña arredor de 20 ºC, nivel ideal para unha vivenda. Cada grao adicional supón un 5% máis de consumo de enerxía.
• Axuste o termóstato do frigorífico segundo a temperatura ambiente. Os alimentos precisan 3 ºC-5 ºC, cada grao que baixe esta temperatura supón aumenta-lo 5% en gasto eléctrico.

Aforrar na augas

• Aproveite ó máximo a capacidade da lavadora e do lavalouza. Reducirá o consumo de auga, deterxente e enerxía. E alongará a vida dos aparellos.
• Controle o consumo de auga. Unha billa aberta gasta 5 litros de auga por minuto. Repare as fugas de auga.
• Unha billa que pinga supón 60 litros de auga ó día.
• Substitúa o baño pola ducha. Consumirá a cuarta parte de auga e da enerxía que require quentala.

Factura telefónica

• Analice o destino e a hora das súas chamadas máis habituais e compare as tarifas dos distintos operadores para ver qué compañía lle resulta máis económica.
• Realice preferentemente as súas chamadas durante o horario "reducido". Aforrará ata o 50%.
• Pídalle información á súa compañía sobre bonos e plans de desconto. Segundo o operador e o tipo de chamada, pode aforrar ata un 45%.
• Se ten teléfono móbil, faga só as chamadas imprescindibles con el e deixe o resto para cando chegue á casa. As tarifas da telefonía fixa son máis baratas.

Relacións deste contido