Cláusula de submisión exclusiva do Foro barcelonés, abusiva

Unhas editoriais que vendían enciclopedias a prazos demandaban ante os xulgados de Barcelona, de acordo co Foro barcelonés, os clientes que non pagaban as cantidades debidas no tempo acordado. Os clientes non tiñan o seu domicilio na cidade condal e tíñanse que trasladar ata alí para os trámites xudiciais, polo que o xulgado número 35 barcelonés consultoulle ó Tribunal de Xustiza das Comunidades Europeas cál era a lexislación que se debía aplicar no caso, aínda que nas cláusulas de compravenda asinadas aparecese o foro barcelonés. O Tribunal Europeo estimou, en sentencia do 27 de xuño de 2000, que aínda que a cláusula así o reflectía no contrato, a cuestión do foro non fora negociada de xeito individual entre o consumidor e o profesional, e podía considerarse abusiva. Segundo esta sentencia, o feito de que o Tribunal que xulgue o impagamento teña que ser do territorio onde estea domiciliado o profesional, en prexuízo do consumidor, produce un desequilibrio entre os dereitos e obrigas das partes que asinan o contrato. Por iso, o Tribunal Europeo sentencia que, de acordo coa Directiva Europea 93/13 sobre cláusulas abusivas, deberá se-lo xulgado nacional quen deba decidir conforme ós criterios subministrados polo Tribunal de Xustiza das Comunidades Europeas.

Relacións deste contido