A sogra do asegurado non se considerou

O propietario dunha vivenda concertou un seguro multirrisco que cubría o risco de responsabilidade civil do propietario do inmoble fronte a terceiros. Conforme ás cláusulas limitativas da póliza, non terían a condición de "terceiros", e, polo tanto, carecerían de dereito a indemnización con cargo ó seguro, os cónxuxes, ascendentes e descendentes do tomador do seguro e do asegurado. Sucedeu que a consecuencia dun incendio na vivenda morreu a sogra do propietario. A súa muller reclamoulle á compañía de seguros a indemnización por responsabilidade civil a terceiros. A compañía negouse á indemnización, e fíxoo en virtude da cláusula limitativa que sinalaba como "non terceiros" ós familiares ascendentes e descendentes do tomador do seguro e do asegurado. A esposa mantiña que, ó se-lo seu home quen concertou a póliza, a súa nai era un terceiro con dereito a indemnización. A parella estaba casada en réxime de gananciais, polo que os dous eran copropietarios do piso, e por iso o Tribunal Supremo considerou, en sentencia do 16 de maio do 2000, que tamén a esposa tiña a condición de asegurada e estaba sometida ás cláusulas limitativas da póliza. Polo tanto, de acordo ás condicións da póliza, ó se-la finada ascendente da esposa e ser esta copropietaria e asegurada, a finada (a súa nai) non podía ser considerada como terceiro para os efectos do dereito de indemnización por responsabilidade civil.

Relacións deste contido