As contas sen movementos durante máis de 20 anos pasan a ser propiedade do Estado

Os valores e o diñeiro depositados en entidades financeiras que non rexistraron ningún movemento durante un período superior a 20 anos considéranse, segundo o Tribunal Supremo, bens abandonados e a súa titularidade pasa a ser do Estado. As caixas de aforro, sen embargo, viñan dispoñendo do importe destas contas co fin de destinalo a obras sociais e culturais. Isto foi o que orixinou esta demanda do Avogado do Estado en reclamación dos saldos das contas correntes e de aforro. Segundo sentencia do 21 de marzo deste ano, o titular dun depósito de valores ou conta corrente que non efectuara ningún movemento nas últimas dúas décadas perde os seus dereitos sobre elas. Deste xeito, o diñeiro ou os valores depositados en caixas ou bancos en novembro de 1980, ou con anterioridade, que non foran obxecto de movementos considéranse caducados e a súa propiedade pasa a ser de Facenda, e non das caixas de aforro ou bancos. A lei na que se inspira esta práctica legal data de 1928, cando o Ministerio de Facenda dispuxo que tódolos bens abandonados polos seus donos, en valores ou en metálico, e se mantiveran sen tocar durante 20 anos consecutivos pasaban a pertencer ó Estado. Pero un ano despois, as Caixas de Aforros determinaron que o importe das contas caducadas se aplicaría en obras sociais e culturais.

Relacións deste contido