O golpe dun balón nun recreo incapacitouno para toda a vida

Mentres xogaba na hora do recreo no patio da escola e sen que se decatasen os mestres, un neno de sete anos recibiu o golpe dun balón na cabeza. Cando xa estaba na aula, a profesora percibiu que o neno estaba indisposto, lavoulle a cara e levouno á secretaría a agarda-la chegada da súa nai. A indisposición evolucionou desfavorablemente e o neno foi ingresado nun centro hospitalario, pero quedáronlle secuelas que lle provocaron a incapacidade absoluta para toda a vida para rexe-la súa persoa e a total dependencia dos seus pais para realiza-las súas necesidades fisiolóxicas.

Segundo o Supremo, en sentencia do 10 de abril do 2000, a conducta dos profesores merece unha recriminación, xa que está probado que nin sequera repararon no suceso, que xogaban conxuntamente nenos con adolescentes e que a atención que a profesora lle dedicou ó lesionado foi superficial e incorrecta, xa que non lle ofreceu ningún tipo de asistencia sanitaria. Por todo isto, considera a responsabilidade do Ministerio de Educación e Ciencia e condénao a indemniza-los pais do menor coa cantidade de 34 millóns de pesetas.

Relacións deste contido