A rolla da botella saltou producindo a perda de visión do ollo dunha nena

Unha nena de doce anos intentaba abrir unha botella de plástico dun refresco de cola de dous litros cando o tapón de rosca saltou de xeito violento e golpeou o seu ollo dereito. Isto produciulle unha ferida e perdeu a visión dese ollo. No xuízo posterior, os pais da menor solicitaron unha indemnización polos danos e secuelas causados polo tapón.

A Audiencia de Granada, en sentencia do 12 de febreiro do 2000, considerou de aplicación ó caso a Lei 22/1994 sobre Responsabilidade Civil por danos ocasionados por productos defectuosos, segundo a cal un producto é defectuoso cando non ofrece a seguridade que lexitimamente se debe esperar del e, en calquera caso, cando non ofrece a seguridade ofrecida normalmente polos demais exemplares da serie. Os pais probaron os feitos denunciados por medio de testemuñas, perito, proba documental e confesión. A empresa demandada non probou a súa hipótese, que era a incorrecta manipulación da botella por parte da menor. Probados o defecto, o dano e o nexo de causalidade entre ámbolos dous, fixaron a indemnización por danos físicos e morais na cantidade de 15 millóns de pesetas, máis os gastos da clínica oftalmolóxica.

Relacións deste contido