Sobre a responsabilidade de Tabacalera na Síndrome de Buerguer

Un fumador demandou a Tabacalera e ó Ministerio de Economía e Facenda e solicitou unha indemnización de 350 millóns de pesetas por responsabilidade extracontractual, xa que, ó seu entender, padecía a enfermidade Síndrome de Buerguer a causa do consumo de tabaco da marca Ducados. Segundo o Xulgado de Primeira Instancia número 70 de Madrid, en sentencia do 7 de abril de 2000, precísanse tres presupostos para que prospere unha acción de responsabilidade extracontractual: a acción ou omisión culpable ou neglixente do demandado (Tabacalera), o resultado daniño e a relación de causalidade entre a acción ou omisión e o dano.

Neste caso, en primeiro lugar, considérase acreditado que o enfermo era gran fumador e seguiu consumindo tabaco a pesar de que cando se lle detectou a enfermidade lle recomendaron que o deixara, e que a enfermidade evolucionou desfavorablemente ata a amputación dos brazos e das pernas. En segundo lugar, conclúese que se descoñece a causa da enfermidade de Buerguer, se ben o consumo de tabaco empeora o estado dos enfermos, pero sen poder afirma-la relación causa-efecto, xa que non tódolos enfermos son fumadores e, ó suprimi-lo tabaco, non desaparece a enfermidade, aínda que mellora a súa evolución. Por todo o anterior, segundo o xulgado, non é posible establecer unha relación de causalidade entre o consumo de tabaco e a enfermidade e desestímase a reclamación, condenando en custas ó demandante.

Relacións deste contido