Reclamou a pensión de viuvez da súa esposa falecida

Desde xaneiro de 1991, unha muller viúva percibía unha pensión da Seguridade Social polo falecemento do seu home. En abril de 1998 e con cincuenta e oito anos de idade, volve casar, e falece dous días despois. O seu segundo esposo, en calidade de herdeiro da súa muller, reclámalle á Seguridade Social dous millóns e medio de pesetas coas que esta ía ser indemnizada en razón do artigo 11-a da Orde Ministerial do 13 de febreiro de 1967. Segundo esta Orde, a pensión de viuvez extínguese por contraer novas nupcias ou tomar estado relixioso.

En ámbolos dous casos, e sempre que o cambio de estado sexa antes de face-los sesenta anos, o titular da pensión de viuvez terá dereito a percibir, por unha soa vez, unha cantidade igual ó importe de vintecatro mensualidades da pensión que viñese percibindo. E esta era a cantidade que reclamaba o esposo viúvo. Presentada a reclamación ante o Tribunal Superior de Xustiza do País Vasco, este di en sentencia de 1999, que se trata dunha indemnización compensatoria pola extinción do dereito á pensión de viuvez, dereito que adquiriu a falecida o día da súa voda. Este dereito, continúa o Tribunal Superior, non é de carácter persoalísimo, senón económico e, polo tanto, transmítese por herdanza, e pode exerce-los seus dereitos, neste caso, o seu segundo esposo.

Relacións deste contido