Venta del domicilio familiar tras un divorcio

Hai un ano escaso que teño a sentencia firme de divorcio. Segundo esta sentencia asígnaseme o uso da vivenda que foi o domicilio familiar, algo ó que o meu ex cónxuxe se opuxo desde o principio. Agora afirma que puxo o asunto en mans do seu avogado, para demandarme e que a casa sexa poxada e así, finalmente, se venda. ¿Pódese facer isto?

A atribución a un dos cónxuxes do dereito de uso da vivenda que foi domicilio familiar supón a exclusión do outro cónxuxe respecto deste dereito, pero non o priva da posibilidade de pedi-la división de cousa común. É dicir, a resposta á pregunta é que si, que o ex cónxuxe pode presentar no xulgado unha acción de División de Cousa Común coa finalidade de que a casa sexa poxada, de xeito que repartan entre ambos o prezo obtido coa poxa. E iso porque esta acción de división de cousa común é un dereito indiscutible de calquera dos copropietarios, xa que ó estaren divorciados e, polo tanto, estar liquidada a sociedade de gananciais, o que ámbolos ex cónxuxes posúen é un condominio ordinario sobre a vivenda.

Pero a cuestión esencial é cómo pode afectar esta división ó dereito de uso do cónxuxe a quen se atribuíu a vivenda, e se é posible que este dereito se extinga. E, ó respecto, coidamos que unha sentencia que estime a división e, no seu caso, a venda en poxa pública da vivenda ten que respectar e garanti-lo dereito de uso recoñecido por outra sentencia. Pensamos que o exercicio da acción de división de cousa común por un copropietario non lle permite pasar por riba de dereitos concedidos a outro copropietario por sentencia firme. Convén, neste caso, conciliar intereses e chegar a acordos co ex cónxuxe para evita-lo preito. Se non fose posible e o ex cónxuxe demandase a división de cousa común, o conveniente é acudir a un avogado que defenda a subsistencia do dereito de uso a pesar da división de cousa común. En definitiva, unha eventual sentencia que estime a división de cousa común e, neste caso, a venda en poxa pública da vivenda, non ha afectar ó dereito de uso á vivenda familiar establecido a favor dun cónxuxe por sentencia de divorcio.

Relacións deste contido