Obrigas do administrador de predios

¿É obrigatorio nun edificio de propiedade horizontal contrata-los servicios dun administrador de predios? Queriamos saber, segundo as leis vixentes, cáles son as obrigas que ten un administrador de predios coa comunidade que o contratou.

Segundo a Lei de Propiedade Horizontal, non é obrigatorio contata-los servicios dun Administrador de Predios. As funcións de secretario e administrador serán exercidas polo presidente da comunidade, agás que os estatutos ou a Xunta de propietarios dispoña destes cargos separadamente por maioría simple. Polo tanto, o cargo de administrador pode ser exercido polo mesmo presidente ou por calquera outro propietario. Sen embargo, se a comunidade o desexa e así o decide por maioría, pode nomear administrador unha persoa física non propietaria, sempre que teña unha cualificación profesional suficiente e legalmente recoñecida.

Tamén se pode nomear unha persoa xurídica. Respecto á segunda cuestión, as obrigas dun administrador para coa comunidade, desde o punto de vista das súas funcións, son: velar polo bo réxime da casa, as súas instalacións e servicios, preparar coa debida antelación e someter á Xunta o plan de gastos previsibles e atender á conservación da casa, dispoñendo as reparacións e medidas que resulten urxentes. Ademais, o administrador executará os acordos adoptados en materia de obras, efectuará os pagamentos e realizará os cobros procedentes. E, no seu caso, como secretario da Xunta custodiará, e poñerá ó dispor dos titulares, a documentación da comunidade. Por último, gozará de tódalas demais atribucións que lle confira a Xunta de propietarios.

Relacións deste contido