O premio do billete de lotería extraviado cobrouse xunto cos intereses

Unha persoa demandou a Administración Pública polos danos sufridos como consecuencia do extravío, por parte daquela, dun boleto de lotería. O xogador cumprira coa totalidade das obrigas que lle eran esixibles, e cando o documento estaba xa en mans da Administración, o billete perdeuse. O extravío, debido a unha neglixencia da Administración, determinou a anulación do boleto. Esta perda e a posterior anulación fixeron que o xogador non percibise o importe dos dous premios que lle correspondían. Considera o Tribunal Supremo, en sentencia do 15 de decembro de 1999, que o xogador, ó cumprir con tódalas súas esixencias, non tiña obriga xurídica de soporta-lo dano que lle causaba a anulación do boleto. Ademais, o seu resgardo non tiña manipulacións: o selo testemuñaba o pagamento e a presentación, e os números elixidos correspondíanse cos premiados, polo que as vicisitudes posteriores da súa tramitación, por parte do establecemento receptor e dos servicios administrativos correspondentes que causaron a desaparición dos boletos, non podían xera-la perda do dereito a cobra-lo premio. O Tribunal Supremo imponlle á Administración o pago dos premios máis intereses legais por demora desde febreiro de 1986, por esixencias do principio de responsabilidade patrimonial da Administración Pública.

Relacións deste contido