Nabigatze-menua pasa eta edukietara joan

EROSKI CONSUMER, el diario del consumidor

Bilatzailea

logotipo de fundación

EROSKI CONSUMEReko kanalak


Kokapen honetan zaude: Hasiera > Paperezko bertsioa

^

LAZTANA, PUBLIZITATEA HAURRAK GIZENTZEN ARI DA

EZ DAKITE IRAKURTZEN, BAINA BI URTEREKIN ASKI ONGI BEREIZTEN DUTE MARKA BAT BERE LOGOARI ESKER. ZORTZI URTE EGITEN DITUZTENEAN, IRAGARKI ASKO ETA ASKO HAIEN BILA JOATEN DIRA ZUZENEAN, ETA ESKAINTZEN DIZKIETEN PRODUKTUAK EZ DIRA HAIN OSASUNGARRIAK. HAURREI BEGIETATIK SARTZEN ZAIZKIE, ETA AHOAREKIN ESKATZEN DITUZTE. HAURREN GIZENTASUNAK ERAGITEN DITUEN ARAZO ASKO TELEBISTAN HASTEN DIRA.

 

Ederki bereizten dute freskagarrietan zein den bizitzaren txinparta pizten duena. Aski ongi ezagutzen dute zein gozokik daukan barrenean oparitxo bat, izan jostailua edo izan txokolatea. Gure haurrek badakite zer-nolako markak eta produktuak dauden eslogan horien atzean, behin eta berriz ikusi dituztelako telebistan.

Hiru eta hamalau urte arteko herritarrek gailu horren aurrean ematen dute beren aisialdiko denboraren zatirik handiena. Zehazki, 6,79 ordu astean, halaxe dio Familien Osasunari buruzko II. Azterlanak, Caser etxeak egindakoak. Eta, hain zuzen, bizitzako lehen urteetan barneratzen dituzte elikatzeko ohiturak, bizitza osorako barneratu ere. Edarien eta elikagaien iragarkiz beteta daude telebistak, eta adingabeek spot zaparrada gaitza jasaten dute: urtean 7.000 eta 10.000 artean heltzen zaizkie; hau da, 25 egunean. Izutzeko moduko kopuruak dira, eta are izugarriagoak dira horrek dakartzan ondorioak, haurrak emozionalki oso zaurgarriak baitira estimulu horien aurrean.

Lehenbiziko haurtzaroan, ez dugu jakiten telebistan publizitatea identifikatzen. Zortzi urte egin arte ez gara jabetzen zer-nolako helburu komertzialak dituen, eta 12 egin arte ez gara ohartzen gu limurtzea dela haren helburua, eta Interneten publizitatea zer den bereizteko gaitasunik ere ez dugu izaten adin horretan. Aldiz, 2 urteko haurrak gai izan daitezke zenbait marka ezagutzeko beren logotipoari esker.

IRAUTEN DUTEN ONDORIOAK.

Publizitateak ondorio arriskutsuak izaten ditu neskamutiletan. Telebista ikusten ari direla, zerbait jateko gogoa sentiarazten die, nahiz eta ez izan iragarkian ikusi duten hori eta nahiz eta goserik ez eduki. Eragina izaten du, halaber, elikagai kuttun batzuetarako joera sortzeko garaian, erosketa ohiturak finkatzeko orduan -baldintzatu egiten du gurasoei zer eskatu eta zer ez - eta kontsumo ohiturak barneratzeko tenorean. Eta iritzi horrek indar handiagoa dauka gurasoek esaten dutenak baino. "Haurrek maiztasun handiagoarekin hautatzen dituzte iragarkietako produktuak, nahiz eta gurasoek aukera osasungarriagoak egiteko aholkuak eman". Hitz horiekin laburbiltzen du egoera Elikagaien Publizitatea eta Osasuna. Espainian egoera zertan den izeneko artikuluak.

Hauxe da egiazko arazoa: haurrek telebistatik jasotzen duten publizitate zaparrada guztiaren bi heren inguru produktu osasungaitzei buruzkoa da, gantz saturatuak, azukrea eta gatza kopuru handietan dituzten elikagaiei buruzkoa. Mezu kaltegarri horien eragin eremua Internetera ere zabaldu da, batez ere YouTubera, eta nagusiki gailetak, opilak, zerealak, gozoak, janari lasterra, irabiakiak eta freskagarriak iragartzen dituzte. Amu komertzialak erabiltzen dituzte saltzeko, adibidez jostailuak edo itsasgarriak ematen dituzte opari, edo kirolari ezagunen irudiak edo nutrizio arloko aipuak erabiltzen dituzte, jendeari sinetsarazteko egiaz diren baino osasungarriagoak direla produktu horiek.

 

Argazki hori oso ongi islatzen da Osasun Publikoaren eta Administrazio Sanitarioaren Espainiako Elkarteak (SESPAS) 2016an argitaratu zuen ikerlan batean. Telebistan haurrentzat iragartzen diren elikagaien inguruan egin den ikerketarik handiena egin zuen erakunde horrek Espainian. Lan horretan, bost katek zazpi egunez eman zituzten spotak aztertu zituzten (bost horietatik hiru haurrentzako kateak ziren). Iragarri zituzten 169 produktuetatik, %79,9k nutrizioari eta osasunari lotutako aipuak eta amuak erabili zituzten: "rico en vitaminas y minerales" (bitamina eta mineral ugarikoa), "cero contenido en sal..." (gatzik gabea). Gantz gutxiko esnekiak nabarmendu ziren guztien gainetik. Mezu positibo horiek zeramatzaten elikagai eta edari gehienak, ordea (%62,2), ez ziren batere osasungarriak.

Baina publizitate hori beste hainbat lekutara ere iritsi da: eskolak, haurtzaindegiak, supermerkatuak, jolaslekuak, mediku kontsultak familiei arreta eskaintzeko eta pediatriako zerbitzuak. "Marketin tekniken barrenean sartzen dira babesletza, pertsona ospetsuak, maskotak edo haurrentzako ezagunak diren beste pertsonaia batzuk erabiltzea, posta elektronikotik iristen diren mezuak eta telefonoko testu mezuak, edo marka bat sustatzeko jarduera filantropikoak", adierazi du Julio Basulto dietista-nutrizionistak. Enpresa nagusiek sare sozialak erabiltzen dituzte eta gazteei dei egiten diete marka horiek adiskideen artean goraipatu ditzatela.

ZER DIO PAOS KODEAK

2005ean sortu zen PAOS kodea, eta borondatezko konpromiso bat da, elikaduraren arloko industriek sinatzen dutena estandar etiko batzuk betetzeko. Honako gomendio hauek biltzen ditu: haurrak ez bultzatzea zuzeneko erosketak egitera, haurrei ez ematea informazio engainagarria edo konplexuegia eta sustapenetan ez erabiltzea pertsonaia ospetsuak. 2012. urtean aldaketa aipagarri bat gertatu zen. Ordu arte 12 urte arteko haurrei zuzentzen zitzaien, ikusentzunezkoetan eta komunikabide idatzietan; ordutik aurrera, 15 urte artekoei, eta Interneten ere bai. Asmoak onak izanagatik, ordea, kode hori ez da betetzen. Madrilgo Complutense Unibertsitateak egindako ikerketa baten arabera (haurrentzat diren hiru telebista katetako iragarkiak aztertu zituen, Boing, Disney Channel eta Neox kateetakoak), iragarkien %88,3k urratu egiten dute kodea era batean edo bestean.

Orrialde-zenbaketa



Ekintza honek Bizkaiko Foru Aldundiaren Kultura Sailaren laguntza jaso du

Beste zerbitzu batzuk


Bilatu

Copyright-i buruzko informazioa eta lege-oharra

Visita nuestro canal Eroski Consumer TV

 EROSKI CONSUMERen oso serio hartzen dugu zure datuen pribatutasuna, lege oharra. © EROSKI Fundazioa

EROSKI Fundazioa

Validaciones de esta página

  • : Conformidad con el Nivel Triple-A, de las Directrices de Accesibilidad para el Contenido Web 1.0 del W3C-WAI
  • XHTML: Validación del W3C indicando que este documento es XHTML 1.1 correcto
  • CSS: Validación del W3C indicando que este documento usa CSS de forma correcta
  • RSS: Validación de feedvalidator.org indicando que nuestros titulares RSS tienen un formato correcto