Maletak berandu iritsi, eta kalteordaina eskasa

Nire bikotekideak eta biok joan-etorriko hegaldi bat kontratatu genuen, astebeteko oporrak egiteko, baina maletak ez ziren iritsi. Hurrengo egunean arropa batzuk erosi genituen, hondartzarako oihalak, bainujantziak... astebete horretan beharko genituen gauzak, azken batean. Gauean etorri zitzaizkigun maletak, eta orain kalte-ordain txiki-txikia eskaintzen didate. Eska dezaket gastu guztiak ordain ditzatela?

  Ekipajea desagertzen bada, komeni izaten da berehala egitea erreklamazioa hegazkin konpainiari, eta horretarako, Ekipaje Irregulartasunen Jakinarazpena (PIR) bete behar da, eta kopia bat gorde. Maletak agertzen badira, beste erreklamazio bat aurkeztu behar da, maletak atzeratu direlako eta horrek kalteak sortu dizkigulako (maletak jaso eta 21 egun igaro baino lehen egin behar da bigarren erreklamazio hori). Pauso horiek guztiak egin baditugu eta iruditzen bazaigu ez digutela eman erantzun egokirik, akordio batera heltzen saia gaitezke (azpimarratu egin behar da kalte egin digutela, eta ordainagiri bidez erakutsiko dugu zenbateko kaltea egin diguten). Ados jartzerik lortzen ez badugu eta auzitara jotzea erabakitzen badugu, Merkataritza arloko Epaitegietan jarri beharko dugu salaketak, hegaldia iritsi eta bi urte igaro baino lehen.

Kalte-ordaina zenbatekoa izango den erabakitzeko, honako sistema hau erabiltzen dute: galdu den objektuaren pisua hartzen da aintzat, eta kopuru jakina ematen dute kilo bakoitzeko (17 euro kiloko), baina muga batekin, betiere: 1.000 Igorpen-Eskubide Berezi (DEG) emango dizkigute gehienez ere (unitate hori ezarri zuten bidaiarien hegaldiei buruz Montrealen egin zuten Hitzarmenean, eta 1.200 euro izango dira, gutxi gorabehera).

Kopuru hori, jakina, legeak aurreikusten duen egoerarik larriena gertatuz gero jasoko genuke, baina kaltea hain larria ez denean -maletak egun batez atzeratzea, adibidez-, kalte-ordaina txikiagoa izango da, nahiz eta, kalteez gain, galerak ere kontuan hartu behar diren.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du