Lagunei banku-bermea ematearen arriskuak

Lagun min batek eta haren senargaiak eskatu didate ea emango ote diedan bermea bankuari mailegu pertsonal bat eskatzeko. Zein arrisku izan lezake horrek?

  Bermea ematen duenak, oro har, bere hain hartzen du ardura bat: zordun nagusiek kuota adostuak ordaintzeari utziko baliote, berme-emaileak egin beharko luke. Kontuan hartu behar da beste hau ere: zorra ordaintzen duen berme-emaileak dirua itzultzeko eska diezaioke mailegua eskatu duenari.

Banku-maileguek argi esaten dute berme-emaileari eskatuko diotela ordaindu gabe dagoen zorrari aurre egin diezaiola, eta hark ezin izango diola uko egin ordaintzeari, nahiz eta zordun nagusiek ondasunak badauzkatela frogatzeko modua eduki, mailegu pertsonaletako polizetan berariaz baztertzen baita aukera hori.

Zalantzarik izanez gero, komeni izaten da mailegu-hartzaileek eta berme-emaileek abokatu bati informazioa eskatzea, bakoitzak jakin dezan zein diren bere eskubideak eta betebeharrak. Mailegu-hartzaileen bikote-harremana ez badago behar bezain sendotua, gerta daiteke desadostasunak agertzea eta ezin ados jarri izatea zeinek zein portzentajetan ordaindu behar duen kuota bakoitza. Egoera horrek kalte egin diezaioke berme-emaileari.

Bi berme-emaile jartzeko aukera ere badago, eta horrek are segurtasun handiagoa ematen dio bankuari; zordunek ordaintzen ez badute, bi berme-emaileetako edozeini eskatu ahal izan dio zorra ordain dezala, edo biei bestela.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du