Ezkonbidaiak ez ditu bete kontratuan ageri diren baldintzak

 Bikote batek bidaia konbinatu bat kontratatu zuen. Kenyara eta Maurizio Uhartera joatekoak ziren ezkonbidaian, eta 6.052 euro ordaindu zuten hainbat zerbitzuren truke: hegazkin txartelak, zenbait hoteletan ostatu hartzea, batetik besterako bidaiak, bisitak eta 13 egunetarako mantenua. Bi egunetan, maila apalagoko hoteletan eman zieten ostatu eta lekurik gabe geratu ziren Mauriziorako hegaldian; ondorioz, hara zuzenean joan beharrean (4 orduko bidaia), eskalak eginarazi zizkieten, eta 17 ordu behar izan zituzten iristeko. Salaketa jarri zuten bidaia antolatu zuen bidaia agentziaren aurka eta bidaia agentzia txikizkariaren aurka: 3.274 euro eskatu zituzten kontratua ez betetzeagatik, 600 euro hegaldian lekurik gabe geratzeagatik eta beste 3.274 euro kalte moralengatik. Auzitegiak aintzat hartu zuen salaketa, baina ez oso-osoa, zati bat baizik. Gipuzkoako Probintzia Auzitegiko bigarren atalak, 2008ko irailaren 11ko epaian, 1.396 euroko kalte-ordaina ematera zigortu zuen bidaia agentzia. Kopuru horrekin kitatzen zen, auzitegiaren ustez, kalteak jasan zituzten egunei zegokien ordaina (lau egunetan izan zituzten gorabeherak).

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du