Sakelako telefonoa oparitu diote konpainia aldatzeagatik, baina bateria matxuratua eduki du

Bermearen lehen sei hilabeteetan, legeak kontsumitzailearen alde egiten du. Produktuak matxuraren bat agertzen badu, jatorrizkotzat jotzen du eta berme-emaileak konpondu edo produktua aldatu behar du. Zure kasuan, zaila da kontratua etetea, opari gisa eman baitizute telefonoa, eta horregatik, erreklamazioa egiterakoan, telefonoa aldatzeko eskatu behar zenuke, eta aurrekoaren berdin-berdina emateko galdegin. Ebazpen batzordearen edo epailearen aurrera joango bagina, hezetasunaren argudio hori ez dela objektiboa nabarmendu behar genuke eta, beraz, ez duela pisurik. Halako egoeretan, egokiena izaten da nork bere telefono operadoreari erreklamazio bat aurkeztea, eta guk aurkeztu dugun arazoa zein zenbakirekin erregistratu duten galdetzea; hori eginda, hilabeteko epea hartuko genuke erantzuna jasotzeko. Epe horretan erantzunik emango ez balute edo ezezkoa erantzungo baligute, kontsumoko ebazpen batzordeetara jo dezakegu -doakoa izaten da, eta baliagarria kontsumo arloko arazoak konpontzeko-. Beste aukera bat da erreklamazioa egin eta Kontsumitzailea Informatzeko Udal Bulegoaren bidez aurkeztea. Eta, ebazpen batzordera jo beharrean, Epaitegi zibilera jotzea, eta ahozko epaiketa egitea, abokaturik gabe.

  Nire telefono konpainia utzi, eta zenbakia aldatu gabe, beste konpainia batekin sinatu nuen kontratua denda batean, eta telefono bat oparitu zidaten. Etxera bidali zuten, mezulari bidez, baina bateriak ez zidan ematen 72 ordutik gorako autonomiarik (ez zetorren bat fitxa teknikoak esaten zuenarekin). Bezeroen telefonora deitu nuen, eta esan nien ezabatu zitzatela bateria gehien gastatzen zuten funtzioak, baina arazoa ez zen konpondu, eta kontratu-aldaketa egin nuen dendan ere ez zidaten argitu zer eduki zezakeen. Konponketa zerbitzu ofizialera jo, eta esan zidaten hezetasunak egin ziola kalte, eta hori ez zela haien erantzukizuna. Babesik gabe nagoela iruditzen zait, nik beti zorro batekin babestu baitut nire telefonoa eta sekula ez dut eduki leku bereziki hezeetan.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du