Hegazkin konpainia salatu du hegaldia atzeratu delako

 Bidaiari batek salaketa jarri zuen hegazkin konpainiaren aurka, hegaldia atzeratu zelako, eta 385 euroko ordaina eskatu zion (billeteak balio zuenaren erdia eta 300 euro gehiago kalte moralengatik). Konpainia ez zen aurkeztu epaiketa saiora, eta auziari ihes egin ziola erabaki zuen epaileak. Azkenik, bezeroari eman zion arrazoia. Europan bada legedi bat hegaldiekin sortzen diren gorabeherak arautzeko (hegaldiak bertan behera geratu direla, atzerapenak sortu direla, overbooking-ak gertatu direla...), eta legedi horrek ez du esaten hegaldi bat atzeratzeagatik kalte-ordaina ordaindu behar dela, baina Oviedoko 1. Merkataritza Epaitegiaren iritziz, horrek ez du esan nahi aukera hori kanpo geratzen denik, garraio kontratuak behartu egiten baitu garraiolaria aurreikusitako ordutegia betetzera, non eta ez den ezinbestean atzeratu. Bezeroak eskatu zuen kalte-ordaina egoki jo zuen epaileak, jasan behar izan zituen gorabeheren neurrikoa (2007ko abenduaren 10eko epaia da); gainera, konpainia epaiketa saiora agertu ez zenez bere arrazoiak ematera eta gertaera hari zenbateko kalte-ordaina zegokion eztabaidatzera, salaketa ontzat jo, eta bezeroak eskatzen zuen kopurua ordaintzera zigortu zuen.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du